ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠣᠨᠴᠠᠯᠢᠬᠲᠦ ᠠᠵᠦ ᠦᠢᠯᠡᠰ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠤᠯᠠᠮᠵᠢᠯᠠᠯᠳᠤ ᠤᠯᠠᠭᠠᠨ ᠢᠳᠡᠭᠡᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/3/27
   ᠮᠤᠩᠭᠤᠯᠴᠤᠳ ᠠᠮᠢᠳᠠᠨ ᠮᠠᠯ ᠤᠨ ᠮᠢᠬ᠎ᠠ ᠶᠢ ᠤᠯᠠᠭᠠᠨ ᠢᠳᠡᠭᠡ ᠭᠡᠳᠡᠭ᠃ ᠡᠨᠡ ᠨᠡᠷᠡᠶᠢᠳᠦᠯ ᠴᠢᠰᠤᠨ ᠤ ᠤᠯᠠᠭᠠᠨ ᠦᠩᠬᠡ ᠠᠴᠠ ᠢᠷᠡᠯ ᠲᠠᠢ  ᠪᠠᠶᠢᠬ᠎ᠠ᠃ ᠮᠤᠩᠭᠤᠯᠴᠤᠳ ᠡᠷᠳᠡ ᠤᠷᠢᠳᠤ ᠳᠠᠭᠠᠨ ᠭᠡᠭᠡᠷ᠎ᠡ ᠶᠢᠨ ᠵᠡᠷᠯᠢᠭ ᠠᠮᠢᠳᠠᠨ ᠢ ᠠᠩᠨᠠᠵᠤ ᠮᠢᠬᠠᠨ ᠤ ᠢᠷᠡᠯᠳᠡ ᠪᠠᠨ ᠪᠤᠯᠭᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠰᠡᠬᠦᠯᠡᠷ ᠨᠢ ᠮᠠᠯ ᠮᠠᠯᠵᠢᠯ ᠪᠤᠢ ᠪᠤᠯᠤᠭᠰᠠᠨ ᠠᠴᠠ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠢᠶᠠᠨ ᠠᠰᠢᠭ ᠰᠢᠮ᠎ᠡ ᠪᠠᠷ ᠠᠮᠢᠳᠤᠷᠠᠯ ᠤᠨ ᠭᠤᠤᠯ ᠢᠷᠡᠯᠳᠡ ᠪᠠᠨ ᠪᠤᠯᠭᠠᠵᠤ ᠢᠷᠡᠭᠰᠡᠨ ᠪᠠᠶᠢᠨ᠎ᠠ᠃      ᠮᠤᠩᠭᠤᠯ ᠬᠦᠮᠦᠨ ᠶᠡᠷᠦᠳᠡᠭᠡᠨ ᠠᠮᠠᠨ ᠤ ᠪᠡᠯᠬᠡ ᠶᠢ ᠶᠡᠬᠡᠳᠡ ᠡᠷᠬᠢᠮᠯᠡᠵᠦ᠂ ᠮᠠᠯ ᠨᠢᠳᠤᠯᠬᠤ ᠳᠠᠭᠠᠨ ︽ᠠᠯᠠᠬᠤ ︾ ᠭᠡᠰᠡᠨ ᠦᠬᠡ ᠶᠢ  ᠴᠡᠭᠡᠷᠯᠡᠨ᠂  ︽ᠮᠠᠯ ᠵᠠᠷᠤᠬᠤ︾᠂ ︽ᠱᠦᠯᠦ ᠤᠤᠭᠤᠬᠤ︾᠂ ︽ᠢᠳᠡᠰᠢ ᠢᠳᠡᠬᠦ︾ ᠬᠡᠬᠦ ᠮᠡᠳᠦ ᠪᠠᠷ ᠬᠡᠯᠡᠳᠡᠭ᠃  ᠵᠤᠨ ᠨᠠᠮᠤᠷ ᠲᠠᠭᠠᠨ ᠮᠠᠯ ᠲᠠᠷᠭᠤ ᠲᠠᠢ ᠦᠶᠡᠰ ᠬᠤᠨᠢᠨ ᠤ ᠱᠦᠯᠦ ᠤᠤᠭᠤᠨ᠎ᠠ᠃ ᠡᠪᠦᠯ ᠎ ᠤᠨ ᠢᠳᠡᠰᠢᠨ ᠤ ᠮᠠᠯ ᠢ ᠪᠤᠯ ᠲᠡᠵᠢᠬᠡᠵᠦ ᠪᠤᠷᠳᠤᠵᠤ ᠪᠠᠶᠢᠭᠠᠳ ᠵᠠᠷᠤᠳᠠᠭ᠃  ᠲᠠᠶᠢᠹᠤᠰᠧ  ᠎ ᠳᠤ ᠠᠳᠤᠭᠤᠨ ᠤ ᠮᠢᠬ᠎ᠠ ᠎ ᠶᠢ ᠪᠤᠯ ᠤᠷᠢᠳᠤ ᠠᠴᠠ ᠪᠠᠨ ᠢᠳᠡᠳᠡᠭ ᠦᠬᠡᠢ ᠵᠠᠩᠰᠢᠯ ᠲᠠᠢ  ᠃ ᠲᠡᠮᠡᠭᠡ᠂ ᠢᠮᠠᠭ᠎ᠠ ᠵᠠᠷᠤᠬᠤ ᠨᠢ ᠴᠤ ᠲᠤᠩ ᠴᠦᠬᠡᠨ᠃  ᠬᠤᠨᠢ ᠵᠠᠷᠤᠬᠤ ᠳᠤ ᠵᠠᠪᠠᠯ ᠦᠷᠦᠴᠡᠯᠡᠵᠦ ᠭᠤᠤᠯ ᠢ ᠨᠢ ᠲᠠᠰᠤᠯᠳᠠᠭ᠂  ᠬᠠᠷᠢᠨ ᠬᠤᠭᠤᠯᠠᠢ ᠶᠢ ᠨᠢ ᠤᠭᠳᠤᠯᠵᠤ ᠴᠢᠰᠤ ᠨᠦᠵᠢ ᠶᠢ ᠨᠢ ᠭᠤᠭᠤᠵᠢᠭᠤᠯᠬᠤ ᠦᠬᠡᠢ᠃  ᠦᠬᠡᠷ ᠢ ᠪᠤᠯ ᠰᠢᠯᠢᠯᠡᠵᠦ ᠵᠠᠷᠤᠨ᠎ᠠ᠃ ᠡᠷᠡᠭᠳᠡᠶᠢᠴᠤᠳ ᠮᠦᠴᠢᠯᠡᠵᠦ ᠰᠠᠯᠭᠠᠬᠤ ᠠᠵᠢᠯ ᠢ ᠬᠢᠵᠦ᠂ ᠡᠮᠡᠭᠳᠡᠶᠢᠴᠤᠳ ᠭᠡᠳᠡᠰᠦ ᠲᠤᠳᠤᠷ ᠠᠷᠢᠯᠭᠠᠬᠤ ᠠᠵᠢᠯ ᠢ ᠬᠦᠢᠴᠡᠳᠭᠡᠨ᠎ᠡ᠃           ᠲᠠᠶᠢᠹᠤᠰᠧ ᠳᠤ ᠭᠡᠳᠡᠰᠦ ᠲᠤᠳᠤᠷ ᠠᠷᠢᠯᠭᠠᠬᠤ ᠶᠢ ︽ᠭᠡᠳᠡᠰᠦ ᠠᠷᠴᠢᠬᠤ︾ ᠬᠡᠵᠦ ᠬᠡᠯᠡᠳᠡᠭ᠂  ᠲᠤᠬᠠᠶᠢᠯᠠᠪᠠᠯ ᠦᠬᠡᠷ ᠬᠤᠨᠢᠨ ᠤ ᠬᠡᠳᠡᠰᠦ ᠶᠢ ᠲᠠᠪᠤᠰᠤ᠂ ᠬᠤᠵᠢᠷ ᠪᠤᠶᠤ ᠼᠤᠤ ᠲᠠᠢ ᠤᠰᠤ ᠪᠠᠷ ᠲᠠᠬᠢᠨ ᠲᠠᠪᠳᠠᠨ ᠤᠬᠢᠶᠠᠵᠤ ᠵᠠᠶᠢᠯᠠᠭᠠᠳ᠂ ᠪᠠᠰᠠ ᠭᠡᠰᠡᠭᠯᠡᠭᠰᠡᠨ ᠠᠭᠤᠰᠬᠢ ᠬᠢᠵᠦ ᠲᠠᠭᠤᠵᠤ ᠴᠡᠪᠡᠷᠯᠡᠳᠡᠭ  ᠃  ᠴᠢᠰᠤᠨ ᠳᠠᠭᠠᠨ ᠲᠠᠪᠤᠰᠤ᠂ ᠰᠤᠩᠬᠢᠨ᠎ᠠ᠂ ᠰᠠᠷᠢᠮᠰᠠᠭ᠂ ᠰᠤᠷᠢᠰᠤ  ᠮᠡᠳᠦ ᠶᠢᠨ ᠠᠮᠳᠠᠯᠢᠭ ᠶᠠᠭᠤᠮ᠎ᠠ ᠬᠢᠵᠦ  ᠨᠠᠶᠢᠷᠠᠭᠤᠯᠤᠭᠠᠳ ᠭᠡᠳᠡᠰᠦᠨ ᠳᠤᠨᠢ  ᠴᠢᠳᠬᠤᠨ᠎ᠠ᠃ ᠬᠤᠳᠤᠭᠤᠳᠤ ᠶᠢ ᠲᠦᠬᠦᠷᠡᠩ ᠴᠢᠳᠬᠤᠳᠠᠭ ᠨᠢ ᠮᠠᠯ ᠰᠦᠷᠦᠭ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠪᠠᠶᠢᠬᠤ ᠶᠢ ᠪᠡᠯᠭᠡᠳᠡᠨ ᠵᠦᠩᠨᠡᠭᠰᠡᠨ ᠰᠠᠨᠠᠭ᠎ᠠ ᠲᠠᠢ᠃ ᠬᠤᠳᠤᠭᠤᠳᠤ ᠶᠢᠨ ᠠᠮᠠᠰᠠᠷ ᠢ  ᠰᠦᠯᠪᠡᠭᠡᠷᠢ ᠪᠠᠷ ᠱᠤᠷᠤᠯᠠᠵᠤ᠂  ᠰᠡᠮᠡᠵᠡ ᠲᠠᠯᠪᠢᠵᠤ ᠨᠠᠷᠢᠨ ᠬᠡᠳᠡᠰᠦ ︵ᠦᠯᠦᠨ ᠬᠡᠳᠡᠰᠦ︶᠎ ᠪᠠᠷ ᠨᠢ ᠪᠤᠭᠤᠳᠠᠭ᠃  ᠬᠤᠳᠤᠭᠤᠳᠤ ᠎ ᠶᠢᠨ ᠠᠮᠠᠰᠠᠷ ᠢ ᠪᠦᠬᠦᠳᠡ ᠶᠢ ᠱᠤᠯᠤᠵᠤ ᠢᠳᠡᠬᠦ ᠶᠢ ᠴᠡᠭᠡᠷᠯᠡᠨ᠂ ᠪᠠᠭ᠎ᠠ ᠭᠡᠰᠡᠭ ᠦᠯᠡᠳᠡᠭᠡᠵᠦ ᠱᠤᠷᠤ ᠶᠢ ᠨᠢ ᠭᠠᠯ ᠎ ᠳᠠᠭᠠᠨ ᠡᠷᠬᠦᠳᠡᠭ᠃ ᠭᠤᠰ ᠭᠡᠳᠡᠭ ᠨᠢ ᠮᠠᠯ ᠤᠨ ᠪᠦᠳᠦᠬᠦᠨ ᠬᠡᠳᠡᠰᠦ ᠶᠢ ᠬᠡᠯᠡᠨ᠎ᠡ᠃ ᠭᠤᠰ ᠢᠶᠠᠨ ᠰᠠᠶᠢᠨ ᠤᠬᠢᠶᠠᠵᠤ ᠴᠡᠪᠡᠷᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠡᠯᠢᠬᠡᠨ ᠴᠤᠷᠤᠢ᠂ ᠴᠤᠬᠤᠷ ᠰᠠᠷᠬᠢᠨᠠᠭ ︵ᠬᠤᠸᠠᠷ ᠲᠠᠢ ᠬᠦᠵᠡᠭᠡ ᠬᠡᠵᠦ ᠪᠠᠰᠠ ᠬᠡᠯᠡᠳᠡᠭ︶᠂ ᠲᠤᠳᠤᠷ ᠬᠡᠳᠡᠰᠦ ︵ᠨᠠᠷᠢᠨ ᠭᠤᠰ ᠢ ᠬᠡᠯᠡᠵᠦ ᠪᠤᠢ︶ ᠵᠡᠷᠭᠡ ᠶᠢ ᠴᠢᠬᠢᠵᠦ᠂ ᠨᠠᠷᠢᠨ ᠲᠠᠯ᠎ᠠ ᠠᠴᠠ ᠪᠦᠳᠦᠬᠦᠨ ᠲᠠᠯ᠎ᠠ ᠤᠷᠤᠭᠤ ᠨᠢ ᠡᠷᠬᠢᠬᠦᠯᠦᠨ᠎ᠡ᠃ ᠬᠦᠵᠡᠭᠡ ᠶᠢ ᠪᠤᠯ ᠪᠤᠴᠠᠯᠤᠭᠰᠠᠨ ᠤᠰᠤ ᠪᠠᠷ ᠵᠤᠮᠠᠯᠵᠤ᠂ ᠬᠢᠳᠤᠭ᠎ᠠ ᠎ ᠪᠠᠷ ᠬᠤᠰᠤᠵᠤ ᠠᠷᠢᠯᠭᠠᠭᠠᠳ  ᠴᠢᠨᠠᠵᠤ  ᠢᠳᠡᠨ᠎ᠡ᠃ ᠪᠠᠰᠠ ᠴᠢᠳᠬᠤᠭᠰᠠᠨ ᠭᠡᠳᠡᠰᠦ ᠪᠠᠨ ᠬᠠᠳᠠᠬᠤ ᠠᠴᠠ ᠰᠡᠷᠭᠡᠶᠢᠯᠡᠨ᠂ ᠬᠦᠵᠡᠬᠡᠨ ᠳᠡᠭᠡᠨ  ᠬᠢᠵᠦ ᠬᠠᠳᠠᠭᠠᠯᠠᠵᠤ ᠪᠤᠯᠤᠨ᠎ᠠ᠂ ᠡᠬᠦᠨ ᠢ ︽ᠵᠠᠶᠢᠳᠠᠰᠤ︾  ᠭᠡᠳᠡᠭ᠃ ᠬᠦᠵᠡᠬᠡᠨ ᠎ ᠳᠤ ᠪᠠᠰᠠ ᠰᠢᠷ᠎ᠠ ᠲᠤᠰᠤ ᠪᠠᠨ ᠬᠢᠵᠦ ᠬᠠᠳᠠᠭᠠᠯᠠᠳᠠᠭ ᠪᠠᠶᠢᠨ᠎ᠠ  ᠃ ᠤᠯᠤᠭᠠᠢ ᠳᠤ ᠴᠢᠰᠤ ᠪᠤᠶᠤ ᠮᠢᠬ᠎ᠠ ᠴᠢᠳᠬᠤᠵᠤ᠂  ︽ᠪᠢᠵᠢ︾  ︵ᠤᠯᠤᠭᠠᠢ ᠶᠢᠨ ᠱᠦᠯᠦ︶᠂  ︽ᠲᠠᠪᠳᠠᠰᠢ  ︾ ᠮᠡᠳᠦ ᠶᠢᠨ ᠢᠳᠡᠭᠡᠨ ᠬᠢᠵᠦ ᠢᠳᠡᠬᠦ ᠠᠴᠠ ᠭᠠᠳᠠᠨ᠎ᠠ ᠰᠢᠷ᠎ᠠ ᠲᠤᠰᠤ ᠪᠠᠨ  ᠴᠢᠳᠬᠤᠭᠠᠳ ᠬᠠᠳᠠᠭᠠᠯᠠᠵᠤ ᠪᠠᠰᠠ ᠪᠤᠯᠳᠠᠭ᠃ ᠲᠤᠯᠤᠭᠠᠢ ᠰᠢᠬᠢᠷ᠎ᠠ ᠶᠢ ᠤᠯᠠᠩᠬᠢ ᠎ ᠳᠠᠭᠠᠨ ᠬᠠᠪᠤᠷ ᠤᠨ ᠴᠠᠭ ᠲᠤ ᠬᠤᠶᠢᠬᠠᠯᠠᠵᠤ ᠢᠳᠡᠳᠡᠭ᠃       ᠮᠢᠬ᠎ᠠ ᠢᠳᠡᠬᠦ ᠳᠤ ᠪᠠᠰᠠ ᠤᠯᠠᠨ ᠴᠡᠭᠡᠷ ᠶᠤᠰᠤᠨ ᠪᠠᠶᠢᠳᠠᠭ᠃  ᠵᠢᠱᠢᠶᠡᠯᠡᠪᠡᠯ᠂ ᠲᠠᠯᠤ ᠶᠢ ᠲᠠᠶᠠᠭᠠᠷ ᠢᠶᠠᠨ ᠢᠳᠡᠬᠦ ᠪᠦᠬᠡᠳ ᠢᠳᠡᠭᠰᠡᠨ ᠤ ᠲᠠᠷᠠᠭ᠎ᠠ  ᠴᠦᠮᠦᠯᠵᠦ  ᠲᠠᠯᠪᠢᠨ᠎ᠠ᠂  ᠨᠠᠭᠠᠴᠤ ᠶᠢᠨ ᠲᠡᠷᠭᠡᠳᠡ ᠲᠠᠯᠤ ᠪᠠᠷᠢᠳᠠᠭ ᠦᠬᠡᠢ  ᠃ ᠬᠠᠪᠢᠷᠭ᠎ᠠ ᠢᠳᠡᠬᠦ ᠳᠤ ᠬᠠᠪᠢᠷᠭᠠᠨ ᠤ ᠤᠭ ᠠᠴᠠ ᠬᠠᠪᠢᠷᠭᠠᠨ ᠤ ᠲᠤᠯᠤᠭᠠᠢ ᠤᠷᠤᠭᠤ ᠱᠠᠭᠠᠯᠵᠤ ᠢᠳᠡᠨ᠎ᠡ  ᠃  ᠡᠪᠴᠢᠬᠦᠦ ᠪᠠᠷ ᠭᠠᠯ ᠢᠶᠠᠨ ᠲᠠᠬᠢᠨ᠎ᠠ᠂ ᠪᠦᠬᠦᠯᠢ ᠬᠤᠨᠢᠨ ᠤ ᠡᠷᠬᠢᠯᠳᠡ ᠳᠤ ᠡᠪᠴᠢᠬᠦᠦ ᠶᠠᠪᠤᠬᠤ ᠦᠬᠡᠢ᠂ ᠬᠠᠷᠢ ᠳᠤ ᠮᠤᠷᠳᠠᠭᠰᠠᠨ ᠬᠡᠦᠬᠡᠨ ᠬᠠᠷᠢᠵᠤ ᠢᠷᠡᠬᠦ ᠳᠤ ᠡᠪᠴᠢᠬᠦᠦ ᠴᠢᠨᠠᠵᠤ ᠢᠳᠡᠬᠦᠯᠳᠡᠭ᠃ ᠨᠢᠳᠦ ᠶᠢ ᠵᠠᠪᠠᠯ ᠬᠤᠤᠰ ᠢᠶᠠᠷ ᠢᠳᠡᠳᠡᠭ᠂ ᠦᠷᠦᠭᠡᠰᠦᠨ ᠨᠢᠳᠦ ᠢᠳᠡᠬᠦ  ᠦᠬᠡᠢ᠃  ᠵᠢᠷᠦᠬᠡ ᠶᠢ ᠤᠭᠳᠤᠯᠬᠤ ᠳᠤ  ᠬᠦᠨᠳᠡᠯᠡᠨ ᠎ ᠢᠶᠠᠷ ᠤᠭᠳᠤᠯᠬᠤ ᠦᠬᠡᠢ᠂  ᠡᠷᠭᠡᠪᠰᠢ ᠭᠤᠯᠳᠤ ᠪᠠᠷ ᠤᠭᠳᠤᠯᠤᠨ᠎ᠠ  ᠃  ᠪᠦᠬᠡᠷ᠎ᠡ ᠶᠢ ᠨᠢᠴᠦᠬᠦᠨ ᠭᠠᠷᠭᠠᠳᠠᠭ ᠦᠬᠡᠢ ᠂ ᠵᠠᠪᠠᠯ ᠦᠬᠡᠬᠦ ᠲᠠᠭᠠᠭᠤᠯᠤᠨ᠎ᠠ᠃ ᠡᠬᠦᠨ ᠠᠴᠠ ᠭᠠᠳᠠᠨ᠎ᠠ᠂  ᠬᠦᠷᠭᠡᠨ ᠬᠦᠮᠦᠨ ᠤ ᠴᠢᠳᠠᠯ ᠢ ᠦᠵᠡᠬᠦ ᠬᠡᠵᠦ ᠬᠦᠵᠦᠬᠦᠦ ᠮᠤᠰᠬᠢᠭᠤᠯᠬᠤ᠂ ᠰᠡᠭᠡᠷ ᠤᠨ ᠮᠢᠬ᠎ᠠ ᠵᠦᠬᠡᠯᠡᠨ ᠬᠡᠵᠦ ᠨᠠᠰᠤᠳᠠᠢ ᠬᠦᠮᠦᠨ ᠳᠤ ᠢᠳᠡᠬᠦᠯᠬᠦ᠂  ᠤᠷᠠᠨ ᠲᠠᠩᠨᠠᠢ ᠢᠳᠡᠪᠡᠯ ᠤᠷᠠᠨ ᠪᠤᠯᠤᠨ᠎ᠠ ᠬᠡᠵᠦ ᠬᠡᠦᠬᠡᠨ ᠬᠦᠮᠦᠨ ᠳᠤ ᠢᠳᠡᠬᠦᠯᠬᠦ  ᠂ ᠬᠤᠨᠢᠨ ᠤ ᠬᠦᠵᠦᠬᠦᠦ  ᠂ ᠪᠤᠭᠳᠤᠭᠤᠰᠤ᠂ ᠱᠠᠭᠠᠨᠳᠤ ᠵᠡᠷᠭᠡ  ᠎ ᠶᠢ ᠵᠤᠴᠢᠨ ᠳᠤ ᠭᠠᠷᠭᠠᠳᠠᠭ ᠦᠬᠡᠢ ᠬᠡᠬᠦ ᠮᠡᠳᠦ ᠶᠢᠨ  ᠶᠤᠰᠤ ᠵᠠᠩᠰᠢᠯ ᠪᠠᠶᠢᠳᠠᠭ᠃  ︽ᠰᠢᠯᠢ ᠢᠳᠡᠪᠡᠯ ᠰᠢᠯᠢ ᠶᠢᠨ ᠬᠤᠯᠠᠭᠠᠶᠢᠴᠢ ᠪᠤᠯᠤᠨ᠎ᠠ᠂ ᠰᠠᠮᠰᠠ ᠢᠳᠡᠪᠡᠯ ᠰᠠᠯᠠᠩ ᠪᠤᠯᠤᠨ᠎ᠠ᠂  ᠬᠡᠦᠬᠡᠨ ᠬᠡᠯᠡ  ᠢᠳᠡᠪᠡᠯ ᠬᠡᠯᠡᠬᠡᠢ ᠪᠤᠯᠤᠨ᠎ᠠ᠂ ᠨᠤᠭᠤᠰᠤ ᠢᠳᠡᠪᠡᠯ  ᠨᠢᠰᠤᠩᠬᠠᠢ ᠪᠤᠯᠤᠨ᠎ᠠ᠂ ᠲᠠᠷᠢᠬᠢ ᠢᠳᠡᠪᠡᠯ ᠲᠡᠨᠡᠭ ᠪᠤᠯᠤᠨ᠎ᠠ︾  ᠬᠡᠮᠡᠨ ᠡᠳᠡᠭᠡᠷ ᠵᠦᠢᠯ ᠢ ᠬᠡᠦᠬᠡᠳ ᠲᠤ ᠢᠳᠡᠬᠦᠯᠳᠡᠭ ᠦᠬᠡᠢ᠃  ᠬᠡᠦᠬᠡᠨ ᠬᠦᠮᠦᠨ ᠭᠤᠳᠤᠩ ᠢᠳᠡᠪᠡᠯ ᠮᠤᠷᠳᠠᠬᠤ ᠦᠶᠡᠰ ᠮᠤᠷᠢ ᠨᠢ ᠲᠤᠶᠢᠯᠠᠨ᠎ᠠ  ᠭᠡᠳᠡᠭ᠃ ᠬᠡᠯᠡᠨ ᠤ ᠦᠵᠦᠬᠦᠷ᠂  ᠨᠤᠶᠢᠷ ᠪᠤᠯᠴᠢᠷᠬᠠᠢ  ᠵᠡᠷᠭᠡ ᠶᠢ ᠢᠳᠡᠳᠡᠭ ᠦᠬᠡᠢ  ᠃      ᠡᠪᠦᠯ ᠤᠨ ᠢᠳᠡᠰᠢ ᠢᠳᠡᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠦᠬᠡᠷ ᠤᠨ ᠮᠢᠬ᠎ᠠ ᠪᠠᠨ ᠪᠤᠷᠴᠠᠯᠠᠨ ᠵᠦᠰᠦᠵᠦ᠂ ᠰᠡᠬᠦᠳᠡᠷ ᠲᠠᠢ ᠪᠦᠬᠡᠳ ᠰᠠᠯᠬᠢ ᠨᠡᠪᠳᠡᠷᠡᠬᠦ ᠭᠠᠵᠠᠷ ᠳᠤ ᠡᠯᠬᠦᠨ ᠬᠠᠳᠠᠭᠠᠳᠠᠭ᠃  ᠢᠩᠬᠢᠵᠦ ᠬᠠᠳᠠᠭᠠᠭᠰᠠᠨ ᠮᠢᠬᠠᠨ ᠤ ᠦᠩᠬᠡ ᠨᠢ ᠴᠠᠶᠢᠪᠤᠷ᠂ ᠵᠦᠬᠡᠯᠡᠨ ᠰᠡᠪᠰᠡᠭᠡᠷ ᠪᠠᠶᠢᠵᠤ ᠢᠳᠡᠬᠦ ᠳᠤ ᠠᠮᠳᠠᠳᠠᠢ᠂  ᠤᠳᠠᠭᠠᠨ ᠬᠠᠳᠠᠭᠠᠯᠠᠬᠤ ᠶᠢ ᠲᠠᠭᠠᠭᠠᠨ᠎ᠠ᠃ ᠪᠤᠷᠴᠠ ᠶᠢ ᠨᠠᠮᠤᠷ ᠲᠠᠭᠠᠨ ᠪᠠᠰᠠ ᠬᠠᠳᠠᠭᠠᠵᠤ ᠪᠤᠯᠤᠨ᠎ᠠ᠃ ᠨᠠᠮᠤᠷ ᠤᠨ ᠪᠤᠷᠴᠠ ᠶᠢ ᠢᠳᠡᠬᠦ ᠳᠤ  ᠬᠤᠷᠰᠢᠭᠰᠠᠨ ᠰᠠᠶᠢᠬᠠᠨ ᠠᠮᠳᠠ ᠲᠠᠢ᠃ ᠨᠠᠮᠤᠷ ᠤᠨ ᠮᠢᠬ᠎ᠠ ᠶᠢ ᠰᠢᠷ᠎ᠠ ᠤᠰᠤ ᠪᠤᠶᠤ ᠴᠠᠭ᠎ᠠ ᠳᠤ ᠲᠡᠪᠳᠦᠬᠡᠵᠦ ᠬᠠᠳᠠᠭᠠᠪᠠᠯ ᠨᠡᠩ ᠰᠠᠶᠢᠨ᠂ ᠠᠮᠳᠠ ᠨᠢ ᠴᠢᠩᠭ᠎ᠠ᠂ ᠢᠯᠠᠭ᠎ᠠ ᠪᠠᠳᠠᠭᠠᠨ᠎ᠠ ᠰᠠᠭᠤᠬᠤ ᠦᠬᠡᠢ᠂ ᠠᠮᠠᠷᠬᠠᠨ ᠬᠠᠳᠠᠨ᠎ᠠ᠃  ᠪᠠᠰᠠ ᠭᠤᠯᠢᠷ ᠲᠦᠷᠬᠢᠬᠦ᠂ ᠲᠠᠪᠤᠰᠤ ᠦᠷᠦᠬᠦ ᠵᠡᠷᠭᠡ ᠠᠷᠭ᠎ᠠ ᠪᠠᠷ ᠬᠠᠳᠠᠭᠠᠳᠠᠭ᠃     ᠮᠢᠬ᠎ᠠ ᠢᠳᠡᠪᠡᠯ ᠱᠦᠯᠦ ᠶᠢ ᠨᠢ ᠤᠤᠭᠤᠬᠤ ᠶᠤᠰᠤᠳᠠᠢ᠂ ᠦᠬᠡᠢ ᠪᠤᠯ ᠬᠠᠮᠠᠭᠤᠳᠤ ︵ᠴᠢᠨ᠋ᠸ᠎ᠠ︶᠎ ᠳᠤ ᠲᠤᠭᠠᠴᠠᠭᠳᠠᠨ᠎ᠠ ᠭᠡᠳᠡᠭ᠃  ᠲᠠᠶᠢᠹᠤᠰᠧᠴᠤᠳ ᠮᠢᠬ᠎ᠠ ᠴᠢᠨᠠᠭᠰᠠᠨ ᠱᠦᠯᠦ ᠠᠴᠠ ᠭᠠᠳᠠᠨ᠎ᠠ᠂   ᠬᠠᠷ᠎ᠠ ᠱᠦᠯᠦ᠂ ᠪᠢᠳᠡᠬᠦᠦ ᠱᠦᠯᠦ᠂  ᠶᠠᠰᠤᠨ ᠤ ᠱᠦᠯᠦ᠂ ᠤᠯᠤᠭᠠᠢ ᠶᠢᠨ ᠱᠦᠯᠦ ᠵᠡᠷᠭᠡ ᠶᠢ ᠬᠢᠵᠦ ᠢᠳᠡᠳᠡᠭ᠃ ᠬᠠᠷ᠎ᠠ ᠱᠦᠯᠦ ᠭᠡᠳᠡᠭ ᠨᠢ ᠵᠢᠵᠢᠭᠯᠡᠨ ᠭᠡᠷᠴᠢᠭᠰᠡᠨ ᠬᠤᠨᠢᠨ ᠤ ᠮᠢᠬ᠎ᠠ ᠪᠠᠨ ᠲᠠᠪᠤᠰᠤ ᠰᠤᠩᠬᠢᠨ᠎ᠠ ᠲᠠᠢ ᠬᠤᠯᠢᠵᠤ᠂  ᠪᠤᠴᠠᠯᠭᠠᠵᠤ  ᠪᠤᠯᠭᠤᠭᠰᠠᠨ ᠱᠦᠯᠦ ᠶᠢ ᠬᠡᠯᠡᠨ᠎ᠡ᠃  ᠪᠢᠳᠡᠬᠦᠦ ᠱᠦᠯᠦ  ᠪᠤᠯ ᠬᠡᠢ ᠲᠠᠷᠤᠵᠤ ᠪᠡᠶ᠎ᠡ ᠲᠠᠮᠢᠷᠵᠢᠭᠤᠯᠳᠠᠭ᠂ ᠱᠦᠯᠦ ᠶᠢᠨ ᠲᠤᠳᠤᠷᠠᠬᠢ ᠤᠬᠢ ᠱᠦᠯᠦ ᠶᠤᠮ᠃  ᠬᠢᠬᠦ ᠠᠷᠭ᠎ᠠ ᠨᠢ ᠭᠤᠤᠯ ᠮᠢᠬ᠎ᠠ ᠶᠢ ᠵᠢᠵᠢᠭᠯᠡᠨ ᠭᠡᠷᠴᠢᠭᠡᠳ᠂  ᠲᠠᠪᠤᠰᠤ ᠰᠤᠩᠬᠢᠨ᠎ᠠ ᠲᠠᠢ ᠬᠠᠮᠳᠤ ᠠᠶᠠᠭᠠᠨ ᠳᠤ ᠬᠢᠵᠦ᠂ ᠠᠮᠠᠰᠠᠷ ᠢ ᠨᠢ ᠭᠤᠯᠢᠷ ᠢᠶᠠᠷ ᠪᠦᠳᠡᠭᠡᠨ ᠪᠦᠷᠢᠵᠦ ᠵᠢᠩᠨᠡᠵᠦ ᠭᠠᠷᠭᠠᠨ᠎ᠠ  ᠂ ᠢᠩᠬᠢᠵᠦ  ᠪᠤᠯᠭᠤᠬᠤ ᠶᠢ ᠲᠠᠶᠢᠹᠤᠰᠧ ᠳᠤ ᠪᠠᠰᠠ  ︽ᠳ᠋ᠦᠩᠨᠡᠬᠦ︾ ᠭᠡᠳᠡᠭ᠃  ᠤᠯᠤᠭᠠᠢ ᠳᠤ ᠮᠢᠬ᠎ᠠ ᠭᠡᠷᠴᠢᠵᠦ ᠬᠢᠭᠡᠳ ᠴᠢᠨᠠᠵᠤ ᠪᠤᠯᠭᠤᠭᠰᠠᠨ ᠱᠦᠯᠦ ᠶᠢ ᠤᠯᠤᠭᠠᠢ ᠶᠢᠨ ᠱᠦᠯᠦ  ᠭᠡᠨ᠎ᠡ᠂  ᠪᠠᠰᠠ ︽ᠪᠢᠵᠢ︾  ᠭᠡᠳᠡᠭ ᠃  ᠡᠨᠡ  ᠎ ᠨᠢ ᠮᠢᠬ᠎ᠠ ᠶᠢ ᠮᠢᠬ᠎ᠠ ᠪᠠᠷ ᠪᠤᠭᠤᠭᠰᠠᠨ ᠪᠤᠯᠬᠤᠷ ᠢᠳᠡ ᠬᠦᠴᠦ ᠨᠢ ᠰᠠᠶᠢᠨ  ᠂ ᠪᠢᠳᠡᠬᠦᠦ ᠱᠦᠯᠦ ᠶᠢᠨ ᠦᠢᠯᠡᠳᠦᠯ ᠭᠠᠷᠭᠠᠳᠠᠭ᠃ ᠤᠯᠤᠭᠠᠢ ᠶᠢᠨ ᠱᠦᠯᠦ  ᠪᠤᠯ  ᠮᠦᠨ ᠴᠤ  ᠬᠡᠢ ᠲᠠᠷᠤᠵᠤ ᠲᠠᠮᠢᠷ ᠨᠦᠬᠦᠬᠦ ᠦᠢᠯᠡᠳᠦᠯ ᠎ ᠲᠠᠢ ᠰᠢᠮᠡᠳᠦ ᠢᠳᠡᠭᠡᠨ ᠪᠤᠯᠤᠨ᠎ᠠ᠃ ᠤᠯᠤᠭᠠᠢ ᠶᠢᠨ  ᠱᠦᠯᠦ ᠶᠢ  ᠬᠢᠬᠦ ᠳᠡᠭᠡᠨ  ᠮᠦᠨ ᠴᠤ  ᠭᠤᠤᠯ ᠮᠢᠬ᠎ᠠ ᠶᠢ ᠵᠢᠵᠢᠭᠯᠡᠨ ᠭᠡᠷᠴᠢᠭᠡᠳ᠂  ᠲᠠᠪᠤᠰᠤ ᠰᠤᠩᠬᠢᠨ᠎ᠠ ᠬᠢᠵᠦ ᠴᠢᠨᠠᠨ᠎ᠠ᠃  ᠡᠬᠦᠨ ᠠᠴᠠ ᠭᠠᠳᠠᠨ᠎ᠠ᠂ ᠲᠠᠶᠢᠹᠤᠰᠧᠴᠤᠳ ᠪᠠᠰᠠ ᠬᠠᠳᠠᠭᠰᠠᠨ ᠮᠢᠬ᠎ᠠ ᠪᠠᠨ ᠵᠢᠵᠢᠭᠯᠡᠨ ᠭᠡᠷᠴᠢᠬᠦ ᠪᠤᠶᠤ ᠭᠡᠷᠴᠢᠵᠦ ᠨᠦᠳᠦᠭᠡᠳ ᠵᠦᠬᠡᠬᠡᠢ ᠳᠤ ᠬᠢᠵᠦ ᠵᠢᠩᠨᠡᠨ ᠪᠤᠯᠭᠤᠵᠤ  ᠂ ᠬᠠᠳᠠᠭᠰᠠᠨ ᠮᠢᠬ᠎ᠠ ᠲᠠᠢ ᠵᠦᠬᠡᠬᠡᠢ ᠶᠢᠨ ᠱᠦᠯᠦ ᠢᠳᠡᠳᠡᠭ᠃ ᠶᠠᠰᠤᠨ ᠤ ᠱᠦᠯᠦ ᠪᠤᠯ ᠪᠠᠰᠠ ᠨᠢᠬᠡ ᠵᠦᠢᠯ ᠤᠨ  ᠰᠢᠮ᠎ᠡ ᠲᠡᠬᠦᠯᠳᠡᠷ ᠱᠦᠯᠦ  ᠪᠠᠶᠢᠵᠤ᠂ ᠬᠦᠮᠦᠨ ᠨᠢ ᠴᠢᠮᠦᠬᠡᠨ ᠶᠠᠰᠤᠨ ᠤ ᠱᠦᠯᠦ ᠤᠤᠭᠤᠬᠤ ᠪᠠᠷ ᠪᠠᠷᠠᠬᠤ ᠦᠬᠡᠢ᠂ ᠶᠠᠳᠠᠷ ᠲᠤᠷᠤᠢ ᠮᠠᠯ ᠳᠤ ᠤᠤᠭᠤᠯᠭᠠᠪᠠᠯ ᠲᠦᠷᠭᠡᠨ ᠲᠡᠩᠭᠡᠷᠡᠳᠡᠭ᠃
  
ᠢᠷᠡᠯᠲᠡ᠄ ︽ᠲᠠᠯ᠎ᠠ ᠨᠤᠳᠤᠭ ᠤᠨ ᠨᠡᠬᠦᠳᠡᠯ ᠰᠤᠶᠤᠯ ᠤᠨ ᠪᠡᠯᠬᠡ ᠲᠡᠮᠳᠡᠭ︾ ᠴᠤᠪᠤᠷᠠᠯ ᠪᠢᠴᠢᠭ — ᠲᠠᠶᠢᠹᠤᠰᠧ ᠬᠤᠰᠢᠭᠤ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠦᠨᠳᠦᠰᠦ ᠰᠡᠶᠢᠯᠬᠦ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠮᠤᠷᠢᠨ ᠬᠤᠭᠤᠷ ᠬᠢᠬᠦ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠴᠢᠳᠦᠷ ᠮᠤᠰᠬᠢᠬᠤ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠡᠮᠡᠭᠡᠯ ᠬᠢᠬᠦ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠮᠤᠷᠢᠨ ᠤ ᠡᠳ᠋ᠯᠡᠯ ᠵᠠᠰᠠᠯ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号