ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠣᠨᠴᠠᠯᠢᠬᠲᠦ ᠠᠵᠦ ᠦᠢᠯᠡᠰ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠤᠯᠠᠮᠵᠢᠯᠠᠯᠳᠤ ᠵᠠᠩ ᠦᠢᠯᠡ —  ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠶᠤᠰᠤ ᠵᠠᠩᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/3/26
    ᠮᠤᠩᠭᠤᠯᠴᠤᠳ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠰᠢᠨ᠎ᠡ ᠵᠢᠯ ᠢ ︽ᠴᠠᠭᠠᠨ ᠰᠠᠷ᠎ᠠ︾ ᠭᠡᠳᠡᠭ᠃ ᠡᠨᠡ ᠨᠢ ᠮᠤᠩᠭᠤᠯᠴᠤᠳ ᠡᠷᠳᠡᠨ ᠠᠴᠠ ᠴᠠᠭᠠᠨ ᠦᠩᠬᠡ ᠶᠢ ᠴᠡᠪᠡᠷ ᠠᠷᠢᠭᠤᠨ᠂ ᠡᠷᠬᠢᠮ ᠳᠡᠭᠡᠳᠦ ᠦᠩᠬᠡ ᠪᠠᠷ ᠳᠡᠭᠡᠳᠦᠯᠡᠵᠦ ᠢᠷᠡᠭᠰᠡᠨ ᠲᠠᠢ ᠬᠤᠯᠪᠤᠭᠳᠠᠨ᠎ᠠ᠃  ᠲᠠᠶᠢᠹᠤᠰᠧ  ᠎ ᠶᠢᠨ ᠮᠤᠩᠭᠤᠯᠴᠤᠳ  ᠦᠨᠦ ᠪᠤᠯᠳᠠᠯ᠎ᠠ  ᠴᠠᠭᠠᠨ ᠰᠠᠷ᠎ᠠ  ᠦᠩᠭᠡᠷᠡᠭᠡᠬᠦ  ᠤᠯᠠᠮᠵᠢᠯᠠᠯᠳᠤ  ᠵᠠᠩᠰᠢᠯ ᠢᠶᠠᠨ ᠦᠨᠳᠦᠰᠦᠨ ᠳᠡᠭᠡᠨ ᠭᠡᠪ ᠢᠶᠠᠷ ᠨᠢ  ᠵᠠᠯᠭᠠᠮᠵᠢᠯᠠᠨ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠪᠠᠶᠢᠨ᠎ᠠ᠃       ᠭᠠᠯ ᠲᠠᠬᠢᠬᠤ ᠠᠴᠠ  ᠪᠢᠳᠡᠭᠦᠨ ᠬᠦᠷᠳᠡᠯᠡᠬᠢ  ᠲᠤᠯᠤᠭᠠᠨ ᠡᠳᠦᠷ  ᠪᠤᠯ ᠰᠢᠨ᠎ᠡ ᠶᠢᠨ ᠪᠡᠯᠡᠳᠭᠡᠯ  ᠎ ᠤᠨ ᠬᠠᠮᠤᠭ ᠶᠠᠭᠠᠷᠠᠤ ᠬᠤᠭᠤᠴᠠᠭ᠎ᠠ  ᠃  ᠪᠤᠤᠪᠤ ᠪᠤᠭᠤᠷᠰᠤᠭ ᠬᠠᠭᠠᠷᠢᠬᠤ᠂ ᠰᠢᠨ᠎ᠡ ᠶᠢᠨ ᠱᠦᠯᠦᠨ ᠤ ᠶᠠᠭᠤᠮ᠎ᠠ ᠪᠡᠯᠡᠳᠭᠡᠬᠦ᠂ ᠪᠡᠯᠡᠭ ᠰᠡᠯᠳᠡ ᠲᠦᠬᠦᠭᠡᠷᠬᠦ᠂ ᠪᠠᠩᠰᠢ ᠪᠤᠤᠽᠢ ᠪᠠᠷᠢᠬᠤ ᠵᠡᠷᠭᠡ ᠠᠵᠢᠯ ᠳᠤ ᠶᠠᠭᠠᠷᠠᠨ᠎ᠠ᠃ ᠴᠠᠭᠠᠨ ᠢᠳᠡᠭᠡ ᠶᠢ ᠪᠤᠯ ᠨᠠᠮᠤᠷ ᠠᠴᠠ ᠡᠬᠢᠯᠡᠨ ᠪᠡᠯᠡᠳᠭᠡᠵᠦ ᠨᠦᠬᠡᠬᠦ  ᠪᠠ ᠮᠢᠬ᠎ᠠ ᠱᠦᠯᠦ ᠶᠢ ᠪᠤᠯ ᠡᠪᠦᠯ ᠤᠨ ᠢᠳᠡᠰᠢ ᠢᠳᠡᠬᠦ ᠦᠶ᠎ᠡ ᠳᠤ ᠪᠡᠯᠡᠳᠭᠡᠵᠦ ᠲᠠᠯᠪᠢᠨ᠎ᠠ᠃  ᠡᠮᠡᠭᠳᠡᠶᠢᠴᠤᠳ ᠰᠢᠨ᠎ᠡ ᠶᠢᠨ ᠬᠤᠪᠴᠠᠰᠤ ᠤᠶᠤᠨ᠎ᠠ ᠭᠡᠮᠡᠨ ᠡᠪᠦᠯ ᠤᠨ ᠰᠦᠨᠢ ᠶᠢᠨ ᠤᠷᠳᠤ ᠶᠢ ᠠᠰᠢᠭᠯᠠᠨ᠂ ᠡᠳᠦᠷ ᠰᠦᠨᠢ ᠦᠬᠡᠢ ᠤᠶᠤᠳᠠᠯ ᠳᠤ ᠶᠠᠭᠠᠷᠠᠵᠤ᠂ ᠭᠡᠷ ᠪᠦᠯᠢ ᠪᠠᠷ  ᠎ ᠢᠶᠠᠨ ᠨᠠᠭᠠᠳᠤ ᠵᠠᠬ᠎ᠠ ᠳᠠᠭᠠᠨ ᠨᠢᠬᠡ ᠵᠠᠬ᠎ᠠ ᠰᠢᠨ᠎ᠡ ᠬᠤᠪᠴᠠᠰᠤ ᠲᠠᠢ ᠰᠢᠨᠡᠯᠡᠬᠦᠯᠬᠦ ᠬᠡᠵᠦ ᠴᠢᠷᠮᠠᠶᠢᠳᠠᠭ᠃  ᠠᠶᠢᠯ ᠬᠤᠳᠠᠨ ᠎ ᠤ ᠪᠦᠰᠡᠬᠦᠶᠢᠴᠤᠳ ᠬᠤᠭᠤᠷᠤᠨᠳᠤ ᠪᠠᠨ ᠪᠠᠰᠠ ᠬᠠᠮᠵᠢᠯᠴᠠᠵᠤ ᠤᠶᠤᠨ᠎ᠠ᠃ ᠡᠷᠡᠭᠳᠡᠢ ᠳᠡᠭᠡᠨ ᠲᠡᠪᠡᠯ ᠤᠶᠤᠪᠠᠯ ᠴᠤᠬᠤᠮ ᠭᠠᠷ ᠤᠨ ᠡᠷᠳᠡᠮ ᠢᠶᠠᠨ ᠭᠠᠷᠭᠠᠵᠤ ᠤᠶᠤᠳᠠᠭ ᠭᠡᠨ᠎ᠡ᠂ ᠡᠨᠡ ᠨᠢ ᠲᠡᠬᠦᠨ ᠤ ᠨᠡᠷ᠎ᠡ ᠲᠦᠷᠦ ᠲᠠᠢ ᠬᠤᠯᠪᠤᠭᠳᠠᠬᠤ ᠪᠤᠯᠤᠨ᠎ᠠ᠃ ᠡᠷᠡᠭᠳᠡᠶᠢᠴᠤᠳ ᠰᠢᠨ᠎ᠡ ᠪᠠᠷ ᠠᠶᠢᠯᠴᠢᠯᠠᠵᠤ ᠶᠠᠪᠤᠬᠤ ᠳᠤ ᠬᠢᠷᠠᠬᠠᠢ ᠮᠤᠩᠭᠤᠯ ᠪᠦᠰᠡᠬᠦᠶᠢᠴᠤᠳ ᠬᠡᠨ ᠤ ᠬᠢᠨᠢ ᠲᠡᠪᠡᠯ ᠤᠨ ᠤᠶᠤᠳᠠᠯ ᠰᠠᠶᠢᠨ ᠭᠡᠳᠡᠭ ᠢ ᠠᠵᠢᠵᠤ ᠠᠮᠵᠢᠳᠠᠭ ᠪᠠᠶᠢᠵᠠᠢ᠃  ᠰᠢᠨ᠎ᠡ ᠎ ᠶᠢᠨ ᠶᠠᠭᠤᠮ᠎ᠠ ᠲᠦᠬᠦᠭᠡᠷᠦᠬᠦ ᠪᠠᠷ ᠬᠤᠯᠠ  ᠤᠶᠢᠷ᠎ᠠ ᠶᠢᠨ ᠮᠠᠶᠢᠮᠠᠢ ᠳᠤ ᠶᠠᠪᠤᠵᠤ᠂ ᠪᠤᠤᠪᠤ ᠪᠤᠭᠤᠷᠰᠤᠭ᠂ ᠰᠢᠬᠢᠷ ᠪᠤᠷᠠᠮ᠂ ᠠᠷᠢᠬᠢ ᠲᠠᠮᠠᠬᠢ᠂ ᠦᠵᠦᠮ ᠴᠢᠪᠠᠭ᠎ᠠ᠂ ᠫᠤᠤᠵᠢᠩ ᠵᠡᠷᠭᠡ ᠭᠡᠷᠡᠭᠴᠡᠭᠡᠨ ᠤ ᠶᠠᠭᠤᠮᠠᠰ ᠢ ᠪᠡᠯᠡᠳᠭᠡᠨ᠎ᠡ᠃ ᠤᠷᠢᠳᠤ ᠳᠠᠭᠠᠨ ᠦᠷᠦᠭᠡᠰᠦᠨ ᠴᠢᠯᠠᠭᠤᠨ ᠬᠠᠭᠠᠯᠭ᠎ᠠ  ᠪᠤᠶᠤ ᠬᠠᠷ᠎ᠠ ᠪᠠᠯᠭᠠᠰᠤ᠂ ᠴᠢᠭᠤᠯᠤᠯᠳᠤ ᠬᠠᠭᠠᠯᠭ᠎ᠠ ᠳᠤ ᠬᠦᠷᠴᠦ ᠲᠦᠬᠦᠭᠡᠷᠳᠡᠭ ᠪᠠᠶᠢᠵᠠᠢ᠃ ᠴᠠᠭᠠᠨ ᠰᠠᠷ᠎ᠠ ᠭᠠᠷ ᠲᠠᠳᠠᠭᠤ ᠪᠠᠶᠢᠬᠤ ᠶᠢ ᠴᠡᠭᠡᠷᠯᠡᠵᠦ᠂ ᠴᠢᠳᠠᠬᠤ ᠶᠢᠨ ᠬᠢᠷᠢ ᠎ ᠪᠠᠷ ᠡᠯᠪᠡᠭ ᠲᠡᠯᠪᠡᠭ ᠪᠡᠯᠡᠳᠭᠡᠳᠡᠭ᠃  ᠠᠶᠢᠯ ᠪᠦᠷᠢ ᠭᠡᠳᠦᠨ ᠵᠠᠭᠤ ᠠᠴᠠ ᠬᠡᠳᠦᠨ ᠮᠢᠩᠭᠠᠭᠠᠳ ᠪᠠᠩᠰᠢ ᠪᠠᠷᠢᠵᠤ ᠬᠦᠯᠳᠡᠭᠡᠬᠦ ᠪᠦᠭᠡᠳ ᠪᠠᠩᠰᠢ ᠲᠤᠳᠤᠷ᠎ᠠ ᠪᠠᠨ ᠠᠷᠢᠭᠤᠳᠬᠠᠵᠤ ᠴᠡᠪᠡᠷᠯᠡᠭᠰᠡᠨ ᠵᠢᠵᠢᠭ ᠮᠦᠩᠬᠦᠨ ᠵᠤᠭᠤᠰ᠂ ᠭᠠᠤᠯᠢᠨ ᠵᠤᠭᠤᠰ᠂ ᠵᠠᠷᠢᠮ ᠳᠤᠨᠢ ᠴᠠᠭᠠᠨ ᠤᠳᠠᠰᠤ ᠬᠢᠵᠦ ᠪᠤᠭᠤᠳᠠᠭ᠃ ᠵᠤᠭᠤᠰ ᠲᠠᠢ ᠪᠠᠩᠰᠢ ᠤᠯᠵᠤ ᠢᠳᠡᠭᠰᠡᠨ ᠬᠦᠮᠦᠨ ᠢ ᠤᠯᠵᠠ ᠤᠯᠤᠨ᠎ᠠ ᠭᠡᠬᠦ ᠪᠠ ᠤᠳᠠᠰᠤ ᠲᠠᠢ ᠪᠠᠩᠰᠢ  ᠲᠠᠭᠠᠷᠠᠭᠰᠠᠨ ᠬᠦᠮᠦᠨ ᠢ ᠤᠷᠳᠤ ᠨᠠᠰᠤᠯᠠᠨ᠎ᠠ ᠬᠡᠮᠡᠨ ᠪᠡᠯᠭᠡᠰᠢᠶᠡᠳᠡᠭ᠃  ᠪᠢᠳᠡᠭᠦᠨ ᠠᠴᠠ ᠡᠮᠦᠨ᠎ᠡ  ᠬᠠᠭᠤᠴᠢᠨ ᠵᠢᠯ ᠳᠡᠭᠡᠨ ᠬᠠᠷᠢ ᠳᠤ ᠮᠤᠷᠳᠠᠭᠰᠠᠨ ᠬᠡᠦᠭᠡᠨ ᠢᠶᠠᠨ ᠡᠷᠬᠢᠨ᠎ᠡ᠃ ᠬᠡᠦᠭᠡᠨ ᠡᠷᠬᠢᠬᠦ  ᠎ ᠳᠤ ᠭᠤᠤᠯᠳᠠᠭᠤ ᠪᠤᠯᠭᠤᠭᠰᠠᠨ ᠬᠤᠨᠢᠨ ᠤ ᠮᠢᠬ᠎ᠠ ᠪᠤᠶᠤ ᠴᠠᠭᠠᠨ ᠢᠳᠡᠭᠡ  ᠂ ᠪᠤᠤᠪᠤ ᠪᠤᠭᠤᠷᠰᠤᠭ ᠭᠡᠷᠡᠭᠯᠡᠨ᠎ᠡ᠃  ᠤᠶᠢᠷ᠎ᠠ ᠬᠠᠪᠢ ᠳᠠᠭᠠᠨ ᠪᠤᠯ ᠪᠢᠳᠡᠬᠦᠨ ᠤ ᠡᠳᠦᠷ ᠡᠷᠭᠢᠭᠰᠡᠨ ᠴᠤ ᠪᠤᠯᠤᠨ᠎ᠠ᠃      ᠪᠢᠳᠡᠬᠦᠯᠡᠬᠦ  — ᠪᠢᠳᠡᠬᠦᠯᠡᠬᠦ ᠪᠠ ᠰᠢᠨᠡᠯᠡᠬᠦ ᠪᠤᠯ ᠬᠤᠨᠤᠭ ᠤᠨ ᠬᠤᠭᠤᠷᠤᠨᠳᠤ ᠵᠠᠯᠭᠠᠯᠳᠤᠭᠰᠠᠨ᠂ ᠬᠠᠭᠤᠴᠢᠨ ᠵᠢᠯ ᠢᠶᠠᠨ ᠦᠳᠡᠵᠦ ᠰᠢᠨ᠎ᠡ ᠵᠢᠯ ᠢᠶᠠᠨ ᠤᠭᠳᠤᠨ᠂ ᠨᠠᠰᠤ ᠨᠡᠮᠡᠭᠰᠡᠨ ᠪᠠᠶᠠᠷ ᠢ ᠪᠡᠯᠬᠡᠯᠡᠬᠦ ᠬᠠᠮ ᠪᠠᠶᠠᠷ ᠨᠠᠶᠢᠷ ᠪᠤᠯᠤᠨ᠎ᠠ ᠃ ᠪᠢᠳᠡᠬᠦᠨ ᠤ ᠡᠳᠦᠷ ᠪᠤᠯᠬᠤ ᠳᠤ ᠬᠡᠷ ᠲᠡᠷᠭᠡ᠂ ᠡᠬᠦᠳᠡ ᠬᠠᠭᠠᠯᠭ᠎ᠠ᠂ ᠬᠦᠷᠢᠶ᠎ᠡ ᠬᠠᠰᠢᠶ᠎ᠠ ᠪᠠᠨ ᠬᠢᠯᠠ ᠪᠠᠭᠤᠳᠠᠯ᠎ᠠ ᠴᠡᠪᠡᠷᠯᠡᠵᠦ᠂ ᠮᠤᠷᠢ  ᠤᠨᠤᠭᠠᠨ ᠤ ᠪᠠᠨ ᠲᠠᠯ ᠰᠡᠬᠦᠯ ᠢ ᠵᠠᠰᠠᠨ᠂ ᠡᠮᠡᠬᠡᠯ ᠬᠠᠵᠠᠭᠠᠷ ᠢᠶᠠᠨ ᠭᠠᠩᠭᠠᠯᠠᠵᠤ᠂  ᠴᠠᠭᠠᠨ ᠰᠠᠷ᠎ᠠ ᠳᠤ ᠡᠮᠦᠰᠬᠦ ᠲᠡᠪᠡᠯ᠂ ᠪᠦᠰᠡ᠂ ᠮᠠᠯᠠᠭᠠᠢ᠂ ᠭᠤᠳᠤᠯ᠂  ᠵᠠᠰᠠᠯ ᠵᠢᠮᠰᠡᠭ ᠢᠶᠠᠨ  ᠪᠡᠯᠡᠳᠭᠡᠬᠦ ᠶᠢᠨ ᠬᠠᠮᠳᠤ᠂  ᠵᠦᠯᠬᠦᠵᠦ ᠠᠷᠴᠢᠬᠤ᠂ ᠦᠰᠦ ᠲᠤᠯᠤᠭᠠᠢ ᠪᠠᠨ ᠤᠬᠢᠶᠠᠬᠤ᠂ ᠴᠠᠭᠠᠨ ᠢᠳᠡᠭᠡ ᠵᠠᠰᠠᠬᠤ᠂ ᠤᠯᠪᠤᠭ ᠰᠢᠷᠳᠡᠭ ᠲᠡᠪᠢᠰᠬᠦ ᠂ ᠬᠤᠤᠰ ᠤᠶᠠᠩᠭ᠎ᠠ ᠨᠠᠭᠠᠬᠤ᠂ ᠲᠡᠭᠷᠢ ᠶᠢᠨ ᠵᠤᠯᠠ ᠤᠷᠢᠶᠠᠬᠤ᠂  ᠮᠦᠷ ᠤᠨ ᠵᠦᠭ ᠦᠵᠡᠬᠦᠯᠬᠦ ᠵᠡᠷᠭᠡ ᠠᠵᠢᠯ ᠤᠳ ᠎ ᠢ ᠠᠮᠵᠢᠨ ᠬᠦᠢᠴᠡᠳᠭᠡᠬᠦ ᠪᠠ  ᠪᠤᠷᠬᠠᠨ ᠢᠶᠠᠨ ᠠᠷᠴᠢᠵᠤ ᠵᠦᠯᠬᠦᠨ᠂ ᠲᠠᠬᠢᠯ ᠴᠦᠬᠦᠴᠡ ᠶᠢ ᠠᠷᠢᠭᠤᠳᠬᠠᠵᠤ᠂ ᠨᠢᠨᠳᠡᠷ ᠬᠠᠳᠠᠭ ᠡᠯᠬᠦᠨ᠂ ᠤᠰᠤᠨ ᠲᠠᠬᠢᠯ ᠲᠠᠬᠢᠨ᠎ᠠ᠃ ᠪᠠᠰᠠ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠤ ᠲᠡᠭᠷᠢ ᠳᠤ ᠮᠦᠷᠬᠦᠬᠦ ᠶᠡᠨᠳᠡᠷ ᠎ ᠢ ᠪᠡᠯᠡᠳᠭᠡᠨ᠎ᠡ᠃  ᠲᠤᠬᠠᠶᠢᠯᠠᠪᠠᠯ ᠬᠦᠷ ᠴᠠᠰᠤ ᠶᠢ ᠲᠤᠭᠤᠷᠢᠭᠯᠠᠨ ᠡᠰᠬᠡᠵᠦ ᠲᠤᠤᠷ᠎ᠠ ᠠᠴᠠ ᠲᠡᠭᠡᠭᠰᠢ ᠪᠠᠨ ᠶᠢᠰᠦᠨ ᠲᠠᠪᠬᠤᠷ ᠰᠤᠪᠤᠷᠭᠠᠯᠠᠨ ᠪᠤᠰᠬᠠᠭᠠᠳ᠂ 108 ᠰᠢᠷᠭᠡᠭ ᠴᠡᠪᠡᠷ ᠲᠡᠷᠡᠰᠦ ᠶᠢ ᠲᠤᠰᠪᠤᠷᠢ ᠲᠤᠷᠳᠤᠮ ᠰᠢᠨ᠎ᠡ ᠬᠦᠪᠦᠩ ᠎ ᠢᠶᠠᠷ ᠤᠷᠢᠶᠠᠵᠤ ᠪᠠᠭᠯᠠᠭᠠᠳ ᠰᠢᠷ᠎ᠠ ᠲᠤᠰᠤ ᠴᠢᠳᠬᠤᠨ  ᠴᠠᠷᠴᠠᠭᠠᠵᠤ᠂  ᠨᠢᠬᠡ ᠪᠠᠭᠴᠠ ᠬᠦᠵᠢ ᠲᠠᠢ ᠬᠠᠮᠳᠤ ᠶᠡᠨᠳᠡᠷ ᠲᠡᠭᠡᠷ᠎ᠡ ᠪᠠᠨ ᠬᠠᠳᠬᠤᠬᠤ ᠪᠠᠷ ᠪᠡᠯᠡᠳᠭᠡᠵᠦ ᠲᠠᠯᠪᠢᠨ᠎ᠠ᠃  ᠪᠢᠳᠡᠬᠦᠨ ᠳᠤ  ᠪᠢᠳᠡᠬᠦᠦ ᠡᠳᠦᠷ  ᠭᠡᠮᠡᠨ ᠭᠠᠳᠠᠭᠰᠢ ᠶᠠᠭᠤᠮ᠎ᠠ ᠭᠠᠷᠭᠠᠬᠤ ᠦᠬᠡᠢ᠂  ᠮᠦᠨᠴᠦ ᠠᠶᠢᠯ ᠠᠴᠠ ᠵᠢᠬᠡᠯᠡᠵᠦ ᠬᠡᠷᠡᠭᠯᠡᠭᠰᠡᠨ ᠶᠠᠭᠤᠮ᠎ᠠ ᠭᠡᠦᠮ᠎ᠡ ᠶᠢ ᠪᠢᠳᠡᠬᠦᠨ ᠠᠴᠠ ᠡᠮᠦᠨ᠎ᠡ ᠵᠠᠪᠠᠯ ᠪᠤᠴᠠᠭᠠᠨ᠎ᠠ᠃ ᠭᠠᠷ ᠮᠠᠯ ᠢ ᠪᠢᠳᠡᠬᠦᠨ ᠳᠤ ᠡᠷᠳᠡ ᠬᠤᠳᠠᠯᠠᠭᠤᠯᠳᠠᠭ ᠪᠦᠭᠡᠳ  ᠭᠡᠭᠡᠷ᠎ᠡ ᠭᠠᠳᠠᠨ᠎ᠠ ᠪᠤᠶᠤ ᠠᠶᠢᠯ ᠳᠤ ᠬᠤᠨᠤᠭᠤᠯᠬᠤ ᠦᠬᠡᠢ᠃ ᠬᠡᠦᠭᠡᠳ  ᠨᠤᠮ ᠪᠢᠴᠢᠭ ᠢᠶᠠᠨ   ᠤᠯᠠᠭᠠᠨ ᠴᠠᠭᠠᠰᠤ ᠪᠤᠶᠤ ᠤᠯᠠᠭᠠᠨ ᠪᠦᠰ ᠢᠶᠠᠷ ᠪᠠᠭᠯᠠᠵᠤ ᠪᠢᠳᠡᠬᠦᠯᠡᠬᠦ ᠪᠠ ᠡᠮᠡᠭᠳᠡᠶᠢᠴᠤᠳ ᠵᠡᠬᠦᠦ ᠤᠳᠠᠰᠤ ᠪᠠᠨ ᠭᠠᠷ ᠲᠠᠭᠠᠷᠴᠤᠭ ᠲᠠᠭᠠᠨ  ᠪᠠᠭᠯᠠᠵᠤ ᠪᠢᠳᠡᠬᠦᠯᠡᠳᠡᠭ᠃  ᠦᠳᠡ ᠶᠢᠨ ᠬᠤᠶᠢᠨ᠎ᠠ ᠪᠢᠳᠡᠬᠦᠨ ᠤ ᠮᠢᠬ᠎ᠠ ᠪᠠᠨ ᠴᠢᠨᠠᠵᠤ ᠢᠳᠡᠭᠡ ᠪᠤᠳᠠᠭ᠎ᠠ ᠪᠠᠨ ᠪᠡᠯᠡᠳᠭᠡᠨ᠎ᠡ᠃ ᠪᠢᠳᠡᠬᠦᠨ ᠤ ᠢᠳᠡᠭᠡ  ᠪᠦᠬᠦᠨ ᠤ ᠲᠡᠭᠡᠵᠢ ᠠᠴᠠ  ᠴᠡᠪᠡᠷᠭᠡᠨ ᠬᠤᠶᠠᠷ ᠰᠠᠪᠠᠨ ᠳᠤ ᠠᠪᠴᠤ᠂   ᠲᠤᠰᠪᠤᠷᠢ ᠪᠢᠳᠡᠬᠦᠨ ᠪᠠ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠤ ᠲᠡᠭᠷᠢ ᠳᠤ ᠡᠷᠬᠦᠬᠦ ᠳᠤ ᠪᠡᠯᠡᠳᠭᠡᠨ᠎ᠡ᠃   ᠤᠳᠤ ᠭᠠᠷᠬᠤ ᠶᠢᠨ ᠦᠶᠡᠰ ᠲᠡᠭᠷᠢ ᠳᠤ ᠵᠤᠯᠠ ᠪᠠᠨ ᠡᠷᠬᠦᠭᠡᠳ  ᠂ ᠫᠤᠤᠵᠢᠩ ᠲᠠᠯᠪᠢᠵᠤ ᠢᠳᠡᠭᠡᠨ ᠤ ᠲᠡᠭᠡᠵᠢ ᠪᠠᠨ ᠡᠷᠬᠦᠨ ᠮᠦᠷᠬᠦᠵᠦ᠂ ᠭᠠᠯ ᠤᠨ ᠪᠤᠷᠬᠠᠨ ᠎ ᠳᠠᠭᠠᠨ ᠲᠠᠬᠢᠭᠠᠳ ᠪᠢᠳᠡᠬᠦᠨ ᠤ ᠬᠤᠭᠤᠯᠠ ᠪᠠᠨ ᠢᠳᠡᠨ᠎ᠡ᠃  ᠬᠤᠭᠤᠯᠠᠨ ᠠᠴᠠ ᠡᠮᠦᠨ᠎ᠡ ᠦᠶ᠎ᠡ ᠲᠠᠷᠠᠭᠠᠯᠠᠨ ᠰᠠᠭᠤᠵᠠᠭᠠᠵᠤ᠂  ᠴᠠᠢ ᠠᠶᠠᠭᠠᠯᠠᠵᠤ ᠴᠠᠭᠠᠨ ᠢᠳᠡᠭᠡ ᠲᠠᠯᠪᠢᠨ᠎ᠠ᠃ ᠴᠠᠢ ᠤᠤᠭᠤᠵᠤ ᠴᠠᠭᠠᠨ ᠢᠳᠡᠭᠡ ᠠᠮᠰᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠪᠢᠳᠡᠬᠦᠨ ᠤ ᠬᠤᠭᠤᠯᠠ ᠪᠠᠨ ᠭᠠᠷᠭᠠᠵᠤ᠂ ᠲᠤᠤᠷ᠎ᠠ ᠦᠶ᠎ᠡ ᠶᠢᠨ ᠬᠦᠮᠦᠰ ᠪᠤᠰᠴᠤ᠂ ᠲᠡᠪᠡᠯ ᠮᠠᠯᠠᠭᠠᠢ ᠪᠠᠨ ᠵᠠᠰᠠᠭᠠᠳ ᠨᠠᠰᠤᠳᠠᠶᠢᠴᠤᠳ ᠲᠠᠭᠠᠨ ᠠᠷᠢᠬᠢ ᠪᠠᠷᠢᠨ᠎ᠠ᠃ ᠪᠢᠳᠡᠬᠦᠨ ᠳᠤ ᠵᠠᠪᠠᠯ ᠪᠢᠳᠡᠬᠦᠦ ᠬᠤᠭᠤᠯᠠ ᠢᠳᠡᠬᠦ ᠪᠦᠭᠡᠳ ︽ᠲᠤᠯᠤᠭᠠᠨ ᠲᠤᠭᠤᠭ᠎ᠠ ᠲᠠᠯᠪᠢᠵᠤ ᠪᠢᠳᠡᠬᠦᠷᠡᠳᠡᠯ᠎ᠡ ᠪᠠᠨ ᠢᠳᠡᠨ᠎ᠡ︾ ᠬᠡᠳᠡᠭ᠃  ᠪᠢᠳᠡᠬᠦᠦ ᠲᠤᠯᠤᠭᠠᠢ ᠴᠢᠨᠠᠵᠤ ᠪᠢᠳᠡᠬᠦᠨ ᠤ ᠶᠤᠰᠤ ᠶᠢ ᠬᠦᠢᠴᠡᠳᠭᠡᠭᠡᠳ᠂ ᠰᠢᠨ᠎ᠡ ᠶᠢᠨ ᠨᠢᠬᠡᠨ ᠤ ᠦᠷ ᠢᠶᠠᠷ ᠪᠢᠳᠡᠬᠦᠦ ᠲᠤᠯᠤᠭᠠᠢ ᠪᠠᠨ ᠵᠠᠭᠠᠵᠤ ᠲᠡᠭᠷᠢ ᠲᠠᠬᠢᠳᠠᠭ᠃ ᠬᠤᠵᠢᠮ ᠨᠢ ᠪᠠᠩᠰᠢ ᠪᠤᠤᠵᠠ ᠵᠡᠷᠭᠡ ᠪᠢᠳᠡᠬᠦᠦ ᠢᠳᠡᠭᠡ ᠨᠡᠶᠢᠳᠡᠮ ᠢᠳᠡᠬᠦ ᠪᠤᠯᠤᠭᠰᠠᠨ ᠠᠴᠠ ᠲᠡᠷᠡ  ᠶᠤᠰᠤ ᠶᠢ ᠤᠷᠤᠯᠠᠵᠤ ᠲᠦᠬᠦᠮ ᠪᠤᠯᠤᠭᠰᠠᠨ ᠪᠤᠯᠤᠯᠳᠠᠢ᠃ ᠪᠢᠳᠡᠬᠦᠨ ᠤ ᠰᠦᠨᠢ  ᠯᠾᠠᠮᠤ ᠪᠤᠷᠬᠠᠨ  ᠶᠢᠷᠳᠢᠨᠴᠦ ᠶᠢ ᠪᠦᠳᠦᠨ ᠨᠢᠭᠡ ᠡᠷᠬᠢᠵᠦ ᠠᠶᠢᠯ ᠬᠡᠭᠡᠯ ᠦᠬᠡᠢ  ᠱᠠᠬᠠᠶᠢᠵᠤ ᠦᠵᠡᠳᠡᠭ ᠬᠡᠮᠡᠨ ᠬᠡᠯᠡᠯᠴᠡᠳᠡᠭ ᠲᠤᠯᠠ  ᠪᠢᠳᠡᠬᠦᠨ ᠤ ᠪᠠᠩᠰᠢ ᠠᠴᠠ ᠯᠾᠠᠮᠤ ᠪᠤᠷᠬᠠᠨ  ᠎ ᠤ ᠢᠳᠡᠭᠡᠨ ᠪᠤᠯᠭᠠᠵᠤ  ᠴᠤᠩᠬᠤᠨ ᠲᠡᠭᠡᠷ᠎ᠡ ᠪᠠᠨ  ᠭᠤᠷᠪᠠ ᠶᠢ ᠲᠠᠯᠪᠢᠳᠠᠭ  ︵ᠮᠤᠩᠭᠤᠯ ᠭᠡᠷ ᠪᠤᠯ ᠲᠤᠳᠤᠭᠤ ᠲᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠨ᠎ᠠ︶  ᠃  ᠪᠢᠳᠡᠬᠦᠨ ᠤ ᠰᠦᠨᠢ ᠲᠤᠮᠤᠴᠤᠤᠯ ᠪᠠᠷᠤᠭ ᠤᠨᠳᠠᠬᠤ ᠦᠬᠡᠢ ᠦᠩᠬᠡᠷᠡᠭᠡᠳᠡᠭ ᠪᠦᠭᠡᠳ ᠳ᠋ᠧᠩ ᠵᠤᠯᠠ ᠠᠰᠠᠭᠠᠵᠤ ᠭᠡᠷᠡᠯ ᠭᠡᠭᠡ ᠲᠠᠢ ᠬᠤᠨᠤᠳᠠᠭ ᠶᠤᠮ᠃  ᠬᠡᠦᠬᠡᠳ ᠢ ᠪᠤᠯ ᠤᠶᠢᠷ᠎ᠠ ᠲᠦᠷᠦᠯ ᠪᠤᠶᠤ ᠬᠡᠦᠭᠡᠳ ᠤᠨ ᠪᠠᠭᠰᠢ᠂ ᠬᠦᠢ ᠡᠵᠢ ᠨᠢ ᠠᠶᠢᠯ ᠬᠤᠳᠠᠨ ᠳᠠᠭᠠᠨ ᠤᠶᠢᠷᠠᠯᠴᠠᠭ᠎ᠠ ᠪᠠᠶᠢᠪᠠᠯ ᠬᠡᠦᠭᠡᠳ ᠢᠶᠠᠷ ᠪᠢᠳᠡᠬᠦᠨ ᠤ ᠢᠳᠡᠭᠡ᠂ ᠬᠤᠪᠢᠩ ᠲᠠᠢ ᠠᠷᠢᠬᠢ ᠶᠢᠨ ᠬᠠᠮᠳᠤ ᠬᠦᠷᠭᠡᠬᠦᠯᠵᠦ ᠬᠦᠨᠳᠦᠯᠡᠬᠦ ᠶᠤᠰᠤ ᠶᠢ ᠬᠦᠢᠴᠡᠳᠭᠡᠳᠡᠭ᠃ ᠤᠷᠢᠳᠤ ᠳᠠᠭᠠᠨ ︽ᠪᠢᠳᠡᠬᠦᠦ ᠵᠦᠷᠢᠬᠦᠯᠦᠨ᠎ᠡ︾ ᠬᠡᠮᠡᠨ ᠪᠢᠳᠡᠬᠦᠨ ᠤ ᠢᠳᠡᠭᠡ ᠪᠠᠨ ᠬᠠᠷᠢᠯᠴᠠᠨ ᠬᠦᠷᠭᠡᠯᠴᠡᠵᠦ ᠬᠠᠮᠳᠤ ᠪᠠᠷ ᠪᠢᠳᠡᠬᠦᠯᠡᠳᠡᠭ ᠪᠠᠶᠢᠵᠠᠢ᠃        ᠰᠢᠨᠡᠯᠡᠬᠦ  — ᠡᠷᠳᠡ ᠦᠶ᠎ᠡ ᠳᠤ ᠲᠠᠶᠢᠹᠤᠰᠧᠴᠤᠳ ᠰᠢᠨᠡᠯᠡᠬᠦ ᠳᠡᠭᠡᠨ ᠡᠷᠭᠡᠪᠰᠢ ᠠᠷᠪᠠᠨ ᠤ ᠲᠠᠷᠤᠭ᠎ᠠ ᠪᠠᠷ  ᠨᠢᠬᠡᠴᠢᠯᠡᠨ ᠨᠢᠭᠡᠳᠦᠯᠳᠡᠢ ᠰᠢᠨᠡᠯᠡᠬᠦ ᠵᠤᠷᠰᠢᠯ ᠲᠠᠢ ᠪᠠᠶᠢᠪᠠ᠃ ᠡᠨᠡ  ᠎ ᠨᠢ ᠮᠠᠨᠵᠤ ᠶᠢᠨ ᠦᠶ᠎ᠡ ᠶᠢᠨ ᠶᠤᠰᠤ ᠪᠢᠰᠢ  ᠬᠠᠷᠢᠨ ᠡᠵᠡᠨ ᠴᠢᠩᠬᠢᠰ ᠰᠠᠭᠤᠷᠢᠨ ᠳᠤ ᠰᠠᠭᠤᠭᠰᠠᠨ  ᠤᠨ ︵1206︶᠎ ᠠᠴᠠ ᠡᠬᠢᠯᠡᠨ  ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠢᠬᠡᠨ ᠢ ᠲᠦᠷᠦ ᠶᠤᠰᠤᠨ ᠤ ᠪᠠᠶᠠᠷ ᠤᠨ ᠡᠳᠦᠷ ᠢᠶᠠᠷ ᠲᠤᠭᠳᠠᠵᠤ᠂ ᠰᠢᠨ᠎ᠡ ᠶᠢᠨ ᠨᠢᠬᠡᠨ ᠳᠤ ᠦᠨᠳᠦᠷ ᠨᠠᠰᠤᠳᠠᠳ᠂ ᠦᠷᠯᠦᠭ ᠭᠠᠪᠢᠶᠠᠳᠠᠳ ᠢ ᠱᠠᠩᠨᠠᠨ ᠬᠦᠬᠢᠬᠦᠯᠵᠦ ᠲᠦᠷᠦ ᠶᠢᠨ ᠭᠡᠰᠢᠭ ᠬᠦᠷᠳᠡᠭᠡᠨ᠂  ᠭᠡᠷᠡᠭᠳᠡᠨ ᠶᠠᠯᠠᠳᠠᠨ ᠢ ᠦᠷᠦᠰᠢᠶᠡᠨ ᠰᠤᠯᠠᠯᠠᠬᠤ ᠪᠤᠶᠤ  ᠶᠠᠯ᠎ᠠ ᠶᠢ ᠨᠢ ᠬᠦᠩᠭᠡᠷᠡᠬᠦᠯᠵᠦ ᠲᠦᠷᠦ ᠶᠢᠨ ᠠᠭᠤᠴᠢᠯᠠᠯ ᠤᠯᠭᠤᠵᠤ  ᠪᠠᠶᠢᠭᠰᠠᠨ ᠲᠠᠢ ᠬᠤᠯᠪᠤᠭᠳᠠᠨ᠎ᠠ᠃  ᠲᠡᠷᠡ  ᠦᠶ᠎ᠡ ᠳᠤ ᠨᠤᠶᠠᠳ ᠢᠵᠠᠭᠤᠷᠳᠠᠳ ᠴᠦᠮ ᠲᠦᠷᠦ ᠶᠢᠨ ᠤᠷᠳᠤᠨ ᠳᠤ ᠤᠴᠢᠵᠤ ᠪᠠᠶᠠᠷ ᠶᠤᠰᠤᠯᠠᠯ ᠦᠢᠯᠡᠳᠦᠳᠡᠭ ᠪᠠᠶᠢᠭᠰᠠᠨ ᠪᠠ ᠠᠷᠠᠳ ᠢᠷᠭᠡᠳ ᠴᠤ ᠲᠦᠷᠦ ᠶᠢᠨ ᠰᠦᠯᠳᠡ ᠳᠤ ᠮᠦᠷᠬᠦᠨ ᠶᠤᠰᠤᠯᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃      ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠦᠷ ᠤᠨ ᠴᠤᠯᠮᠤᠨ ᠢ ᠤᠭᠳᠤᠨ ᠪᠤᠰᠴᠤ ᠴᠠᠢ ᠴᠦ᠋ ᠪᠠᠨ ᠴᠢᠨᠠᠨ᠂ ᠬᠦᠮᠦᠨ ᠪᠤᠯᠭᠠᠨ ᠰᠢᠨ᠎ᠡ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠭᠤᠶᠤᠯᠠᠨ᠎ᠠ᠃   ᠤᠷᠢᠳᠤ ᠴᠠᠭ ᠲᠤ ᠠᠷᠪᠠᠨ ᠤ ᠲᠤᠳᠤᠷᠠᠬᠢ ᠠᠯᠪᠠ ᠬᠠᠭᠠᠭᠴᠢᠳ ᠪᠠ ᠠᠷᠠᠳ ᠢᠷᠭᠡᠳ ᠪᠦᠷ ᠠᠷᠪᠠᠨ ᠤ ᠲᠠᠷᠤᠭ᠎ᠠ ᠶᠢᠨ ᠭᠠᠳᠠᠨ᠎ᠠ  ᠶᠡᠨᠳᠡᠷ ᠲᠡᠭᠡᠷ᠎ᠡ ᠴᠤᠭᠯᠠᠷᠠᠨ᠂ ᠬᠠᠮᠳᠤ ᠪᠠᠷ ᠲᠠᠬᠢᠯᠭ᠎ᠠ ᠵᠤᠯᠠ ᠪᠠᠨ ᠡᠷᠬᠦᠵᠦ ᠲᠡᠭᠷᠢ ᠳᠤ ᠮᠦᠷᠬᠦᠳᠡᠭ᠃  ᠡᠮᠡᠭᠳᠡᠢ ᠬᠦᠮᠦᠨ ᠶᠡᠨᠳᠡᠷ ᠲᠡᠭᠡᠷ᠎ᠡ ᠤᠴᠢᠳᠠᠭ ᠦᠬᠡᠢ᠂ ᠭᠡᠷ ᠤᠨ ᠢᠶᠠᠨ ᠡᠮᠦᠨ᠎ᠡ ᠭᠠᠷᠴᠤ ᠬᠦᠵᠢ ᠪᠠᠷᠢᠨ ᠵᠡᠬᠦᠨ ᠡᠮᠦᠨ᠎ᠡ ᠵᠦᠭ ᠠᠴᠠ ᠡᠬᠢᠯᠡᠨ ᠵᠦᠪ ᠎ ᠢᠶᠠᠷ ᠡᠷᠬᠢᠵᠦ ᠮᠦᠷᠬᠦᠨ᠎ᠡ᠃      ᠬᠠᠮᠳᠤ ᠪᠠᠷ ᠰᠢᠨᠡᠯᠡᠬᠦ ᠶᠤᠰᠤ ᠪᠠᠨ ᠬᠦᠢᠴᠡᠳᠭᠡᠭᠰᠡᠨ ᠤ ᠲᠠᠷᠠᠭ᠎ᠠ ᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠭᠡᠷ ᠤᠨ ᠰᠢᠨᠡᠯᠡᠯᠳᠡ ᠪᠠᠨ ᠬᠢᠨ᠎ᠡ᠃  ᠭᠡᠷ ᠤᠨ ᠰᠢᠨ᠎ᠡ ᠡᠬᠢᠯᠡᠬᠦ ᠳᠤ ᠮᠦᠨ ᠬᠦ᠋ ᠵᠤᠯᠠ   ᠡᠷᠬᠦᠵᠦ ᠲᠡᠭᠷᠢ ᠳᠤ  ᠮᠦᠷᠬᠦᠨ᠂ ᠬᠡᠶᠢᠮᠦᠷᠢ ᠪᠠᠨ ᠬᠡᠶᠢᠰᠭᠡᠨ᠎ᠡ᠃  ︵ᠲᠡᠭᠷᠢ ᠲᠠᠬᠢᠬᠤ ᠶᠤᠰᠤᠨ ᠢ  ︽ᠲᠠᠬᠢᠯᠭ᠎ᠠ ᠶᠢᠨ ᠵᠠᠩ ᠦᠢᠯᠡ︾᠎ ᠳᠤ ᠨᠠᠷᠢᠨ ᠲᠠᠨᠢᠯᠴᠠᠭᠤᠯᠪᠠ︶      ᠲᠡᠭᠷᠢ ᠳᠤ ᠮᠦᠷᠬᠦᠵᠦ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠭᠡᠷ ᠲᠡᠭᠡᠨ ᠤᠷᠤᠵᠤ ᠰᠢᠨᠡᠯᠡᠨ᠎ᠡ᠃  ᠴᠠᠭᠠᠨ ᠢᠳᠡᠭᠡ᠂ ᠪᠤᠤᠪᠤ  ᠪᠤᠭᠤᠷᠰᠤᠭ ᠢᠶᠠᠨ  ᠰᠢᠷᠡᠭᠡᠨ ᠲᠡᠭᠡᠷ᠎ᠡ ᠵᠠᠰᠠᠭᠠᠳ᠂ ᠬᠠᠳᠠᠭ ᠬᠦᠬᠦᠷ ᠢᠶᠠᠨ ᠪᠠᠷᠢᠯᠴᠠᠨ  ᠂ ᠨᠠᠰᠤᠳᠠᠨ  ᠎ ᠢᠶᠠᠨ ᠬᠤᠶᠢᠮᠤᠷ ᠲᠤ ᠵᠠᠯᠠᠨ ᠰᠠᠭᠤᠯᠭᠠᠵᠤ᠂  ᠲᠤᠷᠤᠭᠰᠢ ᠰᠦᠬᠦᠳᠦᠨ ᠬᠤᠷᠮᠤᠢ ᠲᠡᠪᠢᠰᠴᠦ ᠭᠤᠷᠪᠠ ᠮᠦᠷᠬᠦᠭᠡᠳ  ᠂ ︽ᠠᠪᠤ ᠡᠵᠢ ᠰᠠᠶᠢᠨ ᠰᠢᠨᠡᠯᠡᠪᠡᠦ︖  ︾ ᠬᠡᠬᠦᠴᠢᠯᠡᠨ ᠮᠡᠨᠳᠦᠯᠡᠵᠦ ᠵᠤᠯᠭᠠᠨ᠎ᠠ᠃ ᠲᠡᠭᠡᠷ᠎ᠡ ᠦᠶ᠎ᠡ ᠶᠢᠨ ᠬᠢᠨ ︽ᠰᠠᠶᠢᠨ ᠰᠢᠨᠡᠯᠡᠯ᠎ᠡ᠂ ᠤᠷᠳᠤ ᠨᠠᠰᠤᠯᠠᠵᠤ ᠤᠳᠠᠭᠠᠨ ᠵᠢᠷᠭ᠎ᠠ᠂ ᠨᠠᠷᠠ ᠰᠢᠭ᠋ ᠮᠠᠨᠳᠠ᠂ ᠨᠠᠪᠴᠢ ᠰᠢᠭ᠋ ᠲᠡᠯᠭᠡᠷ︾ ᠭᠡᠬᠦ ᠮᠡᠳᠦ ᠪᠠᠷ  ᠢᠷᠦᠭᠡᠳᠡᠭ᠃ ᠡᠨᠡ ᠮᠡᠳᠦ ᠪᠠᠷ ᠡᠪᠦᠭᠡ ᠡᠮᠡᠭᠡ᠂ ᠠᠪᠤ ᠡᠵᠢ ᠬᠡᠵᠦ ᠲᠠᠷᠠᠭᠠᠯᠠᠨ ᠵᠤᠯᠭᠠᠭᠰᠠᠨ ᠤ ᠲᠠᠷᠠᠭ᠎ᠠ ᠠᠬ᠎ᠠ ᠲᠡᠬᠦᠦ ᠨᠠᠷ ᠴᠤ ᠬᠠᠷᠢᠯᠴᠠᠨ ᠨᠠᠰᠤ ᠲᠠᠷᠠᠭᠠᠯᠠᠨ ᠵᠤᠯᠭᠠᠬᠤ ᠪᠦᠭᠡᠳ ᠠᠬᠠᠰ ᠵᠠᠬᠠᠰ ᠢᠶᠠᠨ ︽ᠮᠤᠷᠢᠯᠠᠵᠤ ᠰᠠᠭᠠᠳᠠ︾ ᠭᠡᠮᠡᠨ  ᠰᠠᠭᠤᠯᠭᠠᠵᠤ ᠵᠤᠯᠭᠠᠳᠠᠭ ᠪᠠᠶᠢᠨ᠎ᠠ᠃ ᠵᠤᠯᠭᠠᠵᠤ ᠪᠠᠷᠠᠪᠠᠯ ᠴᠠᠢ ᠠᠶᠠᠭᠠᠯᠠᠵᠤ᠂ ᠨᠠᠰᠤᠳᠠᠨ ᠨᠢ ᠭᠡᠦᠭᠡᠳ ᠲᠡᠭᠡᠨ ᠰᠢᠨ᠎ᠡ ᠶᠢᠨ ᠰᠦ ᠠᠮᠰᠠᠭᠤᠯᠤᠨ᠎ᠠ᠃ ᠰᠦ  ᠎ ᠶᠢ  ᠬᠤᠶᠠᠷ ᠭᠠᠷ ᠢᠶᠠᠷ  ᠲᠤᠰᠤᠨ ᠠᠪᠴᠤ ᠠᠮᠰᠠᠭᠠᠳ ᠪᠤᠴᠠᠭᠠᠬᠤ ᠶᠤᠰᠤ ᠲᠠᠢ᠂ ᠲᠠᠷᠠᠭ᠎ᠠ ᠨᠢ ᠨᠠᠰᠤᠳᠠᠳ ᠲᠠᠭᠠᠨ ᠰᠢᠨ᠎ᠡ ᠶᠢᠨ ᠠᠷᠢᠬᠢ ᠪᠠᠷᠢᠵᠤ ᠮᠦᠷᠬᠦᠨ᠎ᠡ᠃      ᠬᠡᠷ ᠤᠨ ᠵᠤᠯᠭᠠᠯᠳᠠ ᠲᠠᠭᠤᠰᠪᠠᠯ ᠠᠶᠢᠯ ᠬᠤᠳᠠᠨ ᠳᠠᠭᠠᠨ ᠲᠤᠭᠤᠷᠢᠵᠤ ᠵᠤᠯᠭᠠᠯᠳᠠ ᠬᠢᠨ᠎ᠡ᠃  ᠲᠡᠭᠡᠬᠦ ᠳᠡᠭᠡᠨ ᠨᠠᠰᠤᠳᠠᠨ ᠪᠤᠭᠤᠷᠤᠯᠴᠤᠳ ᠪᠠ ᠲᠡᠭᠡᠳᠦ ᠦᠶ᠎ᠡ ᠪᠤᠯᠬᠤ ᠲᠦᠷᠦᠯ ᠰᠠᠳᠤᠨ ᠳᠠᠭᠠᠨ ᠤᠷᠢᠳᠠᠪᠠᠷ ᠤᠴᠢᠵᠤ  ᠵᠤᠯᠭᠠᠨ᠎ᠠ᠃  ᠠᠶᠢᠯ ᠲᠤᠭᠤᠷᠢᠬᠤ ᠳᠠᠭᠠᠨ ᠬᠠᠳᠠᠭ ᠬᠦᠬᠦᠷ ᠢᠶᠠᠨ ᠠᠪᠴᠤ᠂ ᠭᠤᠶᠤᠯ ᠤᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠬᠦ ᠪᠦᠭᠡᠳ ︽ᠪᠤᠷᠬᠠᠨ ᠳᠤᠨᠢ ᠮᠦᠷᠬᠦᠵᠦ᠂ ᠪᠤᠭᠤᠷᠤᠯ ᠳᠤᠨᠢ ᠵᠤᠯᠭᠠᠬᠤ  ︾ ᠬᠡᠵᠦ ᠤᠷᠢᠳᠠᠪᠠᠷ ᠵᠠᠪᠠᠯ ᠨᠠᠰᠤᠳᠠᠢ ᠲᠤᠮᠤᠭᠠᠳᠠᠢ ᠬᠦᠮᠦᠰ ᠲᠠᠢ  ᠵᠤᠯᠭᠠᠨ᠎ᠠ᠃ ᠠᠶᠢᠯ ᠤᠨ ᠭᠠᠳᠠᠨ᠎ᠠ ᠤᠴᠢᠪᠠᠯ ᠡᠷᠭᠡᠪᠰᠢ  ᠤᠭᠳᠤᠨ ᠭᠠᠷᠴᠤ᠂  ︽ᠰᠠᠶᠢᠨ ᠰᠢᠨᠡᠯᠡᠪᠡᠦ ︾ ᠬᠡᠮᠡᠨ ᠬᠠᠷᠢᠯᠴᠠᠨ ᠮᠡᠨᠳᠦ ᠮᠡᠳᠡᠯᠴᠡᠵᠦ᠂ ᠡᠵᠡᠨ ᠵᠤᠴᠢᠨ ᠬᠠᠷᠢᠯᠴᠠᠨ ︽ᠲᠠ ᠪᠠᠭᠤ᠂ ᠲᠠ ᠪᠠᠭᠤ︾ ᠭᠡᠵᠦ ᠨᠠᠶᠢᠷ ᠲᠠᠯᠪᠢᠯᠴᠠᠨ ᠭᠡᠷ ᠲᠤ ᠤᠷᠤᠳᠠᠭ᠃ ᠨᠠᠰᠤᠳᠠᠢ ᠲᠤᠮᠤᠭᠠᠳᠠᠢ ᠬᠦᠮᠦᠰ ᠢ ᠰᠠᠭᠤᠯᠭᠠᠵᠤ ᠪᠠᠶᠢᠭᠠᠳ ᠬᠦᠬᠦᠷ ᠵᠦᠷᠢᠬᠦᠯᠵᠦ  ᠬᠠᠳᠠᠭ ᠪᠠᠷᠢᠨ ᠰᠢᠨᠡᠯᠡᠨ᠎ᠡ᠃  ᠲᠡᠬᠡᠬᠦ ᠳᠡᠭᠡᠨ ᠬᠦᠬᠦᠷ ᠢ ᠪᠤᠯ ᠭᠡᠷᠯᠡᠭᠰᠡᠨ ᠬᠦᠮᠦᠰ ᠯᠠ ᠭᠡᠷᠡᠭᠯᠡᠨ᠎ᠡ᠃ ᠠᠬᠠᠰ ᠵᠠᠬᠠᠰ ᠎ ᠤᠨ ᠲᠠᠷᠠᠭᠠᠯᠠᠯ ᠢᠶᠠᠷ ᠰᠠᠭᠤᠵᠤ᠂ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠴᠠᠭᠠᠨ ᠢᠳᠡᠭᠡᠨ ᠠᠴᠠ ᠠᠮᠰᠠᠵᠤ᠂ ︽ᠰᠢᠨ᠎ᠡ ᠵᠢᠯ ᠰᠠᠶᠢᠬᠠᠨ ᠪᠤᠯᠤᠯ᠎ᠠ᠂ ᠰᠠᠶᠢᠨ ᠵᠢᠯ ᠪᠤᠯᠬᠤ ᠨᠢ  ︾ ᠬᠡᠬᠦ ᠮᠡᠳᠦ ᠪᠡᠯᠭᠡ ᠲᠠᠢ ᠦᠬᠡᠰ ᠦᠬᠦᠯᠡᠯᠴᠡᠨ᠂  ᠰᠢᠨ᠎ᠡ  ᠎ ᠶᠢᠨ ᠭᠤᠷᠪᠠᠨ ᠭᠡᠮ  ᠪᠠᠷᠢᠵᠤ ᠶᠤᠰᠤ  ᠬᠦᠢᠴᠡᠳᠭᠡᠨ᠎ᠡ᠃  ᠤᠷᠢᠳᠤ  ᠴᠠᠭ ᠲᠤ ᠪᠤᠯ ᠤᠷᠢᠳᠠᠪᠠᠷ ᠪᠤᠷᠬᠠᠨ ᠳᠤᠨᠢ ᠮᠦᠷᠬᠦᠭᠡᠳ ᠰᠢᠨᠡᠯᠡᠳᠡᠭ ᠪᠠᠶᠢᠵᠠᠢ᠃ ᠠᠷᠢᠬᠢ ᠪᠠᠷᠢᠬᠤ ᠳᠤ ᠡᠷᠭᠡᠪᠰᠢ ᠲᠤᠪᠴᠢ ᠪᠠᠨ ᠲᠤᠪᠴᠢᠯᠠᠵᠤ᠂ ᠬᠠᠨᠴᠤᠢ ᠪᠠᠨ ᠪᠠᠭᠤᠯᠭᠠᠨ᠂ ᠮᠠᠯᠠᠭᠠᠢ ᠵᠡᠬᠦᠬᠦ ᠬᠡᠷᠡᠭᠳᠡᠢ᠃ ᠲᠤᠭᠤᠷᠢᠬᠤ ᠳᠠᠭᠠᠨ ᠠᠶᠢᠯ ᠬᠡᠬᠡᠬᠦ  ᠎ ᠶᠢ  ᠴᠡᠭᠡᠷᠯᠡᠵᠦ᠂ ︽ ᠰᠢᠪᠠᠭᠠᠰᠤ ᠲᠠᠢ ᠭᠡᠷ  ᠎ ᠲᠤ ᠴᠤ  ᠤᠷᠤᠵᠤ᠂ ᠱᠠᠯᠳᠠᠩ ᠬᠦᠮᠦᠨ ᠲᠠᠢ ᠴᠤ  ᠠᠭᠤᠯᠵᠠᠨ᠎ᠠ︾  ᠭᠡᠳᠡᠭ᠃ ᠠᠶᠢᠯ ᠲᠤᠭᠤᠷᠢᠵᠤ ᠰᠢᠨᠡᠯᠡᠬᠦ ᠳᠤ ᠬᠡᠦᠭᠡᠳ ᠲᠤ ᠰᠢᠨ᠎ᠡ ᠶᠢᠨ ᠪᠤᠤᠪᠤ ᠦᠭᠳᠡᠭ᠂ ᠠᠶᠢᠯ ᠤᠨ ᠦᠭᠬᠦᠭᠰᠡᠨ ᠪᠤᠤᠪᠤ ᠶᠢ ᠶᠠᠮᠠᠷ ᠴᠤ ᠭᠡᠰᠡᠨ ᠭᠤᠯᠤᠯ ᠦᠬᠡᠢ ᠠᠪᠴᠤ  ᠪᠠᠶᠢᠬᠤ ᠶᠤᠰᠤᠳᠠᠢ᠃     ᠰᠢᠨ᠎ᠡ ᠶᠢᠨ ᠨᠢᠬᠡᠨ ᠳᠤ ᠪᠠᠰᠠ ᠮᠦᠷ ᠭᠠᠷᠭᠠᠬᠤ ᠶᠤᠰᠤ ᠪᠠᠶᠢᠳᠠᠭ᠃ ᠵᠠᠷᠢᠮ ᠠᠶᠢᠯ ᠨᠢ ᠭᠡᠷ ᠤᠨ ᠰᠢᠨᠡᠯᠡᠯᠳᠡ ᠡᠬᠢᠯᠡᠬᠦ ᠠᠴᠠ ᠡᠮᠦᠨ᠎ᠡ ᠭᠠᠷᠭᠠᠵᠤ᠂ ᠵᠠᠷᠢᠮ ᠨᠢ ᠠᠶᠢᠯ ᠬᠤᠳᠠ ᠪᠠᠨ ᠲᠤᠭᠤᠷᠢᠵᠤ ᠪᠠᠷᠠᠭᠠᠳ ᠭᠠᠷᠭᠠᠳᠠᠭ᠃  ᠮᠦᠷ ᠎ ᠤᠨ ᠵᠦᠭ ᠢ ᠬᠦᠮᠦᠨ ᠤ ᠨᠠᠰᠤ ᠵᠢᠯ᠂ ᠮᠡᠩᠬᠡ ᠰᠠᠭᠤᠳᠠᠯ᠂ ᠵᠦᠭ ᠤᠨ ᠡᠵᠡᠯᠡᠭᠴᠢ ᠵᠡᠷᠭᠡ ᠶᠢ ᠰᠢᠨᠵᠢᠵᠦ ᠲᠤᠭᠳᠠᠭᠠᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠂ ᠪᠠᠷᠠᠭᠤᠨ ᠡᠮᠦᠨ᠎ᠡ ᠵᠦᠭ ᠲᠤ ᠮᠤᠷᠳᠠᠭᠠᠳ ᠬᠤᠶᠢᠳᠤ ᠵᠦᠭ ᠠᠴᠠ ᠪᠤᠴᠠ ᠭᠡᠮᠡᠭᠰᠡᠨ ᠪᠤᠯ ᠪᠠᠷᠠᠭᠤᠨ ᠡᠮᠦᠨ᠎ᠡ ᠵᠦᠭ ᠢ ᠴᠢᠭᠯᠡᠵᠦ  ᠮᠤᠷᠳᠠᠭᠠᠳ ᠭᠡᠷ ᠠᠴᠠ ᠨᠡᠯᠢᠶᠡᠳ ᠵᠠᠶᠢᠰ ᠭᠠᠷᠴᠤ᠂  ᠮᠤᠷᠢᠨ ᠤ ᠬᠤᠮᠤᠯ ᠂ ᠬᠤᠨᠢᠨ ᠤ ᠬᠤᠷᠭᠤᠯ ᠵᠡᠷᠭᠡ ᠮᠠᠯ ᠤᠨ ᠪᠠᠭᠠᠰᠤ ᠲᠤᠬᠢᠶᠠᠯᠳᠤᠪᠠᠯ ᠲᠡᠷᠡ ᠭᠠᠵᠠᠷ ᠢ ᠪᠡᠯᠭᠡᠰᠢᠶᠡᠨ ᠪᠠᠭᠤᠵᠤ᠂ ᠪᠠᠷᠠᠭᠤᠨ ᠡᠮᠦᠨ᠎ᠡ ᠵᠦᠭ ᠲᠤ ᠬᠠᠳᠠᠭ ᠪᠠᠷᠢᠵᠤ ᠭᠤᠷᠪᠠ ᠮᠦᠷᠬᠦᠭᠡᠳ᠂  ᠨᠢᠬᠡ ᠭᠡᠰᠡᠭ ᠬᠤᠮᠤᠯ ᠠᠪᠴᠤ ᠡᠪᠦᠷᠳᠦᠯᠡᠭᠡᠳ ᠮᠤᠷᠳᠠᠨ᠎ᠠ᠃ ᠡᠨᠡ  ᠮᠡᠳᠦ ᠪᠠᠷ ᠪᠠᠷᠠᠭᠤᠨ ᠵᠦᠭ᠂ ᠪᠠᠷᠠᠭᠤᠨ ᠬᠤᠶᠢᠳᠤ ᠵᠦᠭ᠂ ᠬᠤᠶᠢᠳᠤ ᠵᠦᠭ ᠎ ᠲᠤ ᠮᠦᠨ ᠶᠤᠰᠤᠴᠢᠯᠠᠨ ᠬᠦᠢᠴᠡᠳᠭᠡᠭᠡᠳ ᠪᠤᠴᠠᠵᠤ ᠢᠷᠡᠨ᠎ᠡ᠃ ᠮᠦᠷ ᠭᠠᠷᠭᠠᠬᠤ ᠪᠠᠷ ᠮᠤᠷᠳᠠᠬᠤ ᠳᠤ ᠦᠳᠡᠨ ᠮᠤᠷᠳᠠᠭᠤᠯᠵᠤ᠂ ᠪᠤᠴᠠᠵᠤ ᠢᠷᠡᠬᠦ ᠳᠤᠨᠢ ︽ᠮᠦᠷ ᠦᠯᠵᠡᠢ ᠲᠠᠢ︖ ᠤᠯᠵᠠ ᠤᠮᠤᠭ ᠲᠠᠢ︖︾ ᠬᠡᠬᠦᠴᠢᠯᠡᠨ ᠤᠭᠳᠤᠵᠤ  ᠮᠡᠨᠳᠦᠯᠡᠬᠦ ᠪᠦᠬᠡᠳ ᠬᠠᠷᠢᠭᠤ ᠳᠤᠨᠢ ︽ᠮᠦᠷ ᠴᠠᠭᠠᠬᠠᠨ᠂  ᠤᠯᠵᠠ ᠲᠠᠢ︾ ᠬᠡᠮᠡᠨ ᠦᠴᠢᠵᠦ᠂ ᠡᠪᠦᠷᠯᠡᠭᠰᠡᠨ ᠬᠤᠮᠤᠯ ᠢᠶᠠᠨ ᠭᠠᠷᠭᠠᠨ ᠦᠵᠡᠬᠦᠯᠵᠦ ᠭᠠᠯ ᠳᠠᠭᠠᠨ ᠬᠢᠨ᠎ᠡ᠃     ᠬᠤᠳᠠ ᠤᠰᠤᠨ ᠳᠠᠭᠠᠨ ᠰᠢᠨᠡᠯᠡᠭᠰᠡᠨ  ᠎ ᠤ ᠲᠠᠷᠠᠭ᠎ᠠ᠂  ᠲᠦᠷᠦᠯ ᠰᠠᠳᠤᠨ᠂  ᠨᠠᠶᠢᠵᠠ ᠨᠦᠬᠦᠳ  ᠎ ᠲᠠᠢ ᠪᠠᠨ ᠰᠢᠨᠡᠯᠡᠬᠦ ᠪᠠᠷ ᠬᠤᠯᠠ ᠶᠢᠨ ᠵᠤᠯᠭᠠᠯᠳᠠ ᠳᠤ ᠮᠤᠷᠳᠠᠳᠠᠭ᠃ ᠭᠤᠶᠤᠵᠤ ᠵᠠᠰᠠᠭᠰᠠᠨ ᠮᠤᠷᠢ ᠪᠠᠨ ᠰᠠᠶᠢᠬᠠᠨ ᠰᠠᠮᠨᠠᠨ ᠬᠤᠰᠤᠭᠤᠷᠳᠠᠵᠤ᠂ ᠵᠠᠷᠢᠮ ᠨᠢ ᠬᠦᠬᠦᠯ ᠰᠡᠬᠦᠯ ᠢ ᠨᠢ ᠤᠯᠠᠭᠠᠨ ᠲᠤᠤᠰᠠ ᠪᠠᠷ ᠴᠢᠮᠡᠵᠦ ᠪᠤᠭᠤᠬᠤ ᠴᠤ ᠪᠤᠢ᠃ ᠬᠡᠬᠦ ᠎ ᠳᠡᠭᠡᠨ ᠰᠢᠨ᠎ᠡ ᠶᠢᠨ ᠪᠡᠯᠡᠭ ᠬᠡᠵᠦ ᠠᠷᠢᠬᠢ᠂ ᠪᠤᠤᠪᠤ  ᠂ ᠴᠠᠭᠠᠨ ᠢᠳᠡᠭᠡ ᠭᠠᠨᠵᠤᠭᠠᠯᠠᠵᠤ  ᠶᠠᠪᠤᠨ᠎ᠠ᠃  ᠡᠷᠳᠡ ᠦᠶ᠎ᠡ ᠎ ᠳᠤ ᠬᠠᠶᠢᠷᠴᠠᠭ ᠤᠨ ᠪᠤᠤᠪᠤ ᠬᠡᠵᠦ ᠪᠠᠷᠤᠭ ᠬᠤᠶᠠᠷ ᠵᠢᠩ ᠤᠨ ᠪᠠᠭᠳᠠᠭᠠᠮᠵᠢ ᠲᠠᠢ᠂ ᠲᠠᠳᠠᠭᠤᠷ ᠠᠮᠠᠰᠠᠷ ᠲᠠᠢ ᠨᠢᠮᠬᠡᠨ ᠮᠤᠳᠤᠨ ᠬᠠᠶᠢᠷᠴᠠᠭ ᠲᠠᠢ ᠪᠤᠤᠪᠤ ᠪᠠᠶᠢᠵᠤ᠂ ᠲᠡᠷᠡ  ᠎ ᠨᠢ ᠰᠢᠬᠦᠰᠦ ᠶᠢ ᠭᠠᠷᠭᠠᠪᠠᠯ ᠲᠡᠭᠡᠳᠦ ᠪᠡᠯᠡᠭ ᠲᠤ ᠤᠷᠤᠳᠠᠭ ᠪᠠᠶᠢᠵᠠᠢ᠃ ᠡᠩ ᠤᠨ ᠪᠡᠯᠡᠭ  ᠪᠤᠯ ᠬᠠᠭᠠᠷᠢᠭᠰᠠᠨ ᠪᠤᠤᠪᠤ ᠶᠢ ᠲᠦᠷᠪᠡᠯᠵᠢᠯᠡᠨ ᠵᠡᠷᠭᠡᠯᠡᠵᠦ᠂ ᠲᠡᠭᠡᠷ᠎ᠡ ᠨᠢ ᠨᠠᠷᠢᠨ ᠪᠤᠤᠪᠤ ᠲᠠᠪᠬᠤᠷᠯᠠᠨ ᠵᠡᠷᠭᠡᠯᠡᠭᠡᠳ᠂  ᠲᠡᠬᠦᠨ ᠤ ᠲᠡᠭᠡᠷ᠎ᠡ ᠨᠢ ᠦᠷᠦᠮ᠎ᠡ ᠪᠢᠰᠢᠯᠠᠭ ᠢᠶᠠᠷ ᠦᠩᠬᠡᠯᠡᠵᠦ᠂  ᠪᠤᠤᠪᠤ ᠶᠢᠨ ᠴᠠᠭᠠᠰᠤ ᠬᠡᠮᠡᠬᠦ ᠰᠢᠷ᠎ᠠ ᠴᠠᠭᠠᠰᠤᠨ ᠳᠤ  ᠪᠠᠭᠯᠠᠵᠤ ᠤᠶᠠᠭᠠᠳ᠂  ᠲᠦᠷᠪᠡᠯᠵᠢᠨ ᠤᠯᠠᠭᠠᠨ ᠴᠠᠭᠠᠰᠤ ᠪᠡᠯᠭᠡᠰᠢᠶᠡᠨ ᠬᠠᠪᠴᠢᠭᠤᠯᠤᠭᠰᠠᠨ ᠪᠠᠶᠢᠳᠠᠭ᠃  ᠮᠦᠨ ᠬᠡᠦᠭᠡᠳ ᠤᠨ ᠪᠤᠤᠪᠤ ᠬᠡᠮᠡᠨ ᠬᠠᠭᠠᠷᠢᠭᠰᠠᠨ ᠪᠤᠤᠪᠤ ᠲᠡᠭᠡᠷ᠎ᠡ ᠨᠠᠷᠢᠨ ᠪᠤᠤᠪᠤ᠂ ᠭᠡᠷᠴᠢᠮᠡᠯ ᠬᠤᠷᠤᠳ ᠪᠠ ᠴᠢᠪᠠᠭ᠎ᠠ ᠰᠢᠬᠢᠷ ᠮᠡᠳᠦ ᠵᠦᠢᠯ ᠢ ᠪᠠᠭᠯᠠᠭᠰᠠᠨ ᠪᠠᠶᠢᠳᠠᠭ᠃       ᠵᠤᠴᠢᠨ ᠤᠭᠳᠤᠬᠤ ᠳᠤ ᠲᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠲᠡᠭᠰᠢ ᠪᠦᠷᠢᠨ ᠡᠮᠦᠰᠦᠭᠡᠳ ᠲᠤᠰᠤᠨ ᠭᠠᠷᠴᠤ᠂ ︽ᠮᠡᠨᠳᠦ ᠰᠠᠶᠢᠨ ᠤᠤ᠂ ᠰᠢᠨ᠎ᠡ ᠪᠠᠷ ᠰᠠᠶᠢᠬᠠᠨ ᠶᠠᠪᠤᠵᠤ ᠪᠠᠶᠢᠨ᠎ᠠ ᠤᠤ︾ ᠬᠡᠮᠡᠨ ᠠᠮᠤᠷ  ᠡᠷᠢᠨ᠎ᠡ᠃  ᠬᠠᠷᠢᠭᠤ ᠮᠡᠨᠳᠦᠯᠡᠬᠡᠳ ᠭᠡᠷ ᠲᠤ ᠤᠷᠤᠬᠤ ᠳᠠᠭᠠᠨ  ︽ᠲᠠ ᠤᠷᠢᠳ ᠮᠤᠷᠢᠯᠠᠵᠤ ᠪᠠᠭᠤ︾ ᠬᠡᠮᠡᠨ ᠬᠠᠷᠢᠯᠴᠠᠨ ᠨᠠᠶᠢᠷ ᠲᠠᠯᠪᠢᠯᠴᠠᠬᠤ ᠪᠦᠬᠡᠳ ᠭᠡᠶᠢᠴᠢᠨ ᠤ ᠠᠬᠠᠮᠠᠳ ᠨᠢ ᠲᠡᠷᠢᠬᠦᠯᠡᠨ ᠭᠡᠷ ᠲᠤ ᠤᠷᠤᠵᠤ᠂ ᠮᠦᠨ ᠠᠬᠠᠰ ᠵᠠᠬᠠᠰ ᠤᠨ ᠲᠠᠷᠠᠭᠠᠯᠠᠯ ᠢᠶᠠᠷ ᠰᠠᠭᠤᠨ᠎ᠠ᠃ ᠭᠡᠷᠪᠡ ᠨᠠᠰᠤᠳᠠᠢ ᠬᠦᠮᠦᠨ ᠭᠠᠷᠴᠤ ᠤᠭᠳᠤᠭᠰᠠᠨ ᠪᠠᠶᠢᠪᠠᠯ ᠬᠡᠶᠢᠴᠢᠳ ᠲᠡᠬᠦᠨ ᠢ ᠲᠦᠰᠢᠨ ᠰᠤᠭᠤᠳᠠᠵᠤ  ᠤᠷᠢᠳᠠᠪᠠᠷ ᠤᠷᠤᠭᠤᠯᠤᠨ᠎ᠠ᠃  ᠠᠶᠢᠯ ᠳᠤ ᠰᠢᠨᠡᠯᠡᠬᠦ ᠨᠢ ᠮᠦᠨ ᠬᠡᠷ ᠤᠨ ᠰᠢᠨ᠎ᠡ ᠶᠢᠨ ᠶᠤᠰᠤᠨ ᠲᠠᠢ ᠠᠳᠠᠯᠢ᠃ ᠬᠠᠳᠠᠭ ᠬᠦᠬᠦᠷ ᠵᠦᠷᠢᠬᠦᠯᠵᠦ  ︽ ᠰᠠᠶᠢᠨ ᠰᠢᠨᠡᠯᠡᠪᠡᠦ᠂ ᠰᠢᠨ᠎ᠡ ᠪᠠᠷ ᠰᠠᠶᠢᠨ ᠮᠤᠷᠢᠯᠠᠵᠤ ᠪᠠᠶᠢᠨ᠎ᠠ ᠤᠤ  ᠂  ᠰᠢᠨ᠎ᠡ ᠬᠠᠭᠤᠴᠢᠨ ᠵᠢᠯ ᠳᠡᠭᠡᠨ ᠯᠠᠭᠱᠠᠨ ᠲᠤᠩᠭᠠᠯᠠᠭ ᠤᠤ︾ ᠬᠡᠬᠦ ᠮᠡᠳᠦ ᠪᠠᠷ ᠠᠮᠤᠷ ᠠᠰᠠᠭᠤᠯᠴᠠᠨ ᠵᠤᠯᠭᠠᠨ᠎ᠠ᠃  ᠬᠤᠯᠠ  ᠎ ᠶᠢᠨ ᠬᠡᠶᠢᠴᠢᠨ ᠳᠤ ᠴᠠᠢ ᠠᠶᠠᠭᠠᠯᠠᠵᠤ ᠴᠠᠭᠠᠨ ᠢᠳᠡᠭᠡ ᠠᠮᠰᠠᠭᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ ᠱᠦᠯᠦ ᠠᠮᠰᠠᠭᠤᠯᠵᠤ᠂ ᠪᠡᠯᠭᠡ ᠲᠠᠢ ᠬᠡᠮᠡᠨ ᠭᠤᠷᠪᠠᠨ ᠬᠡᠮ ᠠᠷᠢᠬᠢ ᠪᠠᠷᠢᠳᠠᠭ᠃ ᠭᠡᠪᠡᠴᠦ ᠶᠡᠭᠡ ᠱᠠᠯᠠᠬᠤ ᠦᠬᠡᠢ᠂ ᠡᠴᠦᠰ ᠤᠨ ᠬᠡᠮ ᠢ ᠪᠡᠯᠬᠡᠬᠦᠯᠵᠦ ᠲᠠᠯᠪᠢᠨ᠎ᠠ᠃  ᠵᠤᠴᠢᠨ ᠬᠡᠷᠪᠡ ᠪᠡᠯᠡᠭ ᠲᠠᠢ ᠢᠷᠡᠭᠰᠡᠨ ᠪᠤᠯ ᠪᠡᠯᠡᠭ ᠤᠨ ᠶᠠᠭᠤᠮ᠎ᠠ ᠲᠡᠭᠡᠷ᠎ᠡ ᠪᠠᠨ ᠬᠠᠳᠠᠭ ᠲᠠᠯᠪᠢᠵᠤ ᠪᠠᠷᠢᠨ᠎ᠠ᠃ ᠨᠠᠰᠤᠳᠠᠳ ᠢᠷᠦᠬᠡᠯ ᠬᠠᠶᠢᠷᠠᠯᠠᠪᠠᠯ ᠬᠠᠷᠢᠭᠤ ᠳᠤᠨᠢ ︽ ᠢᠷᠦᠭᠡᠯ ᠲᠤᠭᠳᠠᠬᠤ ᠪᠤᠯᠳᠤᠭᠠᠢ᠂ ᠢᠷᠦᠬᠡᠯ ᠪᠠᠳᠤ ᠤᠷᠤᠰᠢᠭ︾ ᠬᠡᠬᠦ ᠮᠡᠳᠦ ᠪᠠᠷ ᠪᠡᠯᠭᠡᠴᠢᠯᠡᠨ ᠦᠴᠢᠨ᠎ᠡ᠃  ᠭᠡᠶᠢᠴᠢᠳ ᠵᠠᠮ ᠎ ᠳᠠᠭᠠᠨ ᠤᠴᠠᠷᠠᠪᠠᠯ ᠬᠦᠳᠡᠭᠡ ᠴᠤ ᠭᠡᠰᠡᠨ ᠮᠤᠷᠢᠨ ︵ᠪᠤᠶᠤ ᠮᠠᠰᠢᠨ︶᠎ ᠠᠴᠠ ᠪᠠᠨ ᠪᠠᠭᠤᠵᠠᠭᠠᠵᠤ᠂ ᠬᠠᠷᠢᠯᠴᠠᠨ ᠬᠠᠳᠠᠭ ᠬᠦᠬᠦᠷ ᠵᠦᠷᠢᠬᠦᠯᠵᠦ ᠰᠢᠨᠡᠯᠡᠬᠦ ᠶᠤᠰᠤ ᠲᠠᠢ᠃ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠤ ᠵᠤᠴᠢᠨ ᠠᠶᠢᠯ ᠳᠤ ᠬᠤᠨᠤᠳᠠᠭ ᠦᠬᠡᠢ᠃      ᠰᠢᠨ᠎ᠡ ᠶᠢᠨ ᠭᠤᠷᠪᠠᠨ ᠲᠦᠷᠪᠡᠨ ᠬᠦᠷᠪᠡᠯ ᠬᠡᠶᠢᠴᠢᠨ ᠵᠤᠴᠢᠨ ᠴᠦᠬᠡᠷᠡᠬᠦ ᠲᠤᠯᠠ ᠠᠶᠢᠯ ᠬᠤᠳᠠ ᠶᠢᠨ ᠪᠤᠳᠠᠭᠠᠯᠠᠭ᠎ᠠ ᠡᠬᠢᠯᠡᠨ᠎ᠡ᠃ ᠬᠡᠦᠭᠡᠳ ᠢᠶᠠᠨ ᠤᠴᠢᠭᠤᠯᠵᠤ ︽ᠮᠠᠨ ᠤ ᠳᠤ ᠰᠢᠨ᠎ᠡ ᠶᠢᠨ ᠬᠤᠭᠤᠯᠠ  ᠵᠤᠭᠤᠭᠯᠠ︾  ᠬᠡᠮᠡᠨ ᠵᠠᠯᠠᠭᠤᠯᠬᠤ ᠪᠠ ᠬᠦᠨᠳᠦᠳᠡᠢ ᠬᠦᠮᠦᠨ ᠢᠶᠠᠨ ᠪᠤᠯ ᠦᠪᠡᠷ ᠢᠶᠠᠨ ᠤᠴᠢᠵᠤ ᠵᠠᠯᠠᠨ᠎ᠠ᠃  ᠪᠤᠳᠠᠭᠠᠯᠠᠭ᠎ᠠ ᠳᠤ ᠮᠦᠨ ᠴᠠᠢ ᠠᠶᠠᠭᠠᠯᠠᠵᠤ ᠴᠠᠭᠠᠨ ᠢᠳᠡᠭᠡ ᠲᠠᠯᠪᠢᠬᠤ ᠪᠦᠬᠡᠳ ᠬᠤᠭᠤᠯᠠᠨ ᠳᠤ ᠰᠢᠬᠦᠰᠦ᠂ ᠮᠢᠬ᠎ᠠ᠂ ᠬᠠᠯᠠᠭᠤᠨ ᠲᠤᠭᠤᠭ᠎ᠠ᠂ ᠪᠠᠩᠰᠢ ᠪᠤᠤᠵᠠ ᠵᠡᠷᠭᠡ  ᠎ ᠶᠢ ᠪᠠᠶᠢᠳᠠᠯ ᠢᠶᠠᠨ ᠦᠵᠡᠵᠦ ᠭᠠᠷᠭᠠᠬᠤ ᠪᠤᠯᠪᠠᠴᠤ ᠡᠷᠭᠡᠪᠰᠢ ᠡᠯᠪᠡᠭ ᠪᠡᠯᠡᠳᠭᠡᠨ᠎ᠡ᠃     ᠠᠷᠪᠠᠨ ᠲᠠᠪᠤᠨ ᠠᠴᠠ ᠡᠮᠦᠨ᠎ᠡ ᠰᠢᠨ᠎ᠡ ᠶᠢᠨ ᠴᠠᠭᠠᠨ ᠢᠳᠡᠭᠡ ᠶᠢ ᠬᠤᠷᠢᠶᠠᠬᠤ ᠦᠬᠡᠢ ᠬᠡᠪ ᠢᠶᠠᠷ  ᠪᠠᠶᠢᠯᠭᠠᠨ᠎ᠠ᠂ ᠵᠤᠴᠢᠳ ᠴᠤ  ᠪᠤᠯᠬᠤ ᠶᠢᠨ ᠲᠤᠳᠤᠷ᠎ᠠ ᠠᠷᠪᠠᠨ ᠲᠠᠪᠤᠨ ᠠᠴᠠ ᠡᠮᠦᠨ᠎ᠡ  ᠠᠶᠢᠯᠴᠢᠯᠠᠵᠤ ᠲᠤᠭᠤᠷᠢᠳᠠᠭ  ᠂ ᠠᠷᠪᠠᠨ ᠲᠠᠪᠤᠨ ᠦᠩᠭᠡᠷᠡᠪᠡᠯ ᠰᠢᠨ᠎ᠡ ᠬᠠᠭᠤᠴᠢᠷᠠᠵᠤ ᠭᠡᠪ ᠤᠨ ᠪᠠᠶᠢᠳᠠᠯ ᠳᠠᠭᠠᠨ ᠤᠷᠤᠨ᠎ᠠ᠃
  
ᠢᠷᠡᠯᠲᠡ᠄ ︽ᠲᠠᠶᠢᠹᠦᠰᠧ ᠵᠡᠬᠦᠨ ᠭᠠᠷ — ᠬᠦᠨᠪᠤᠯᠠᠭ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠦᠨᠳᠦᠰᠦ ᠰᠡᠶᠢᠯᠬᠦ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠮᠤᠷᠢᠨ ᠬᠤᠭᠤᠷ ᠬᠢᠬᠦ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠴᠢᠳᠦᠷ ᠮᠤᠰᠬᠢᠬᠤ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠡᠮᠡᠭᠡᠯ ᠬᠢᠬᠦ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠮᠤᠷᠢᠨ ᠤ ᠡᠳ᠋ᠯᠡᠯ ᠵᠠᠰᠠᠯ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号